الله من همن طرى تالي الليل=واستيسر الخافق وكدر مزاجه
همن كبير وله فصدري مداهيل=بين الضلوع الي ربت فإنعواجه
همن على اصعب من الغوص فالنيل=واقسى منه جرحن جهلنا علاجه
بعثر حياتي والآماني مكابيل=واسدل ضلام الكون واطفى سراجه
خلاني اسوق العنا فالمراسيل=للصاحب الي وسط صدري ملاجه
الصاحب الي من خيار المشاكيل=الي على العليا مقطب حجاجه
حلحيل ويضد الرجال الحلاحيل=لاثارت الهيجاء وحصل المواجه
يابن رشيد ان كان تبغى تفاصيل=الوقت من حولي تطاير عجاجه
وضعي خطير ولاحصلي محاصيل=ومثلي تعب عيا يحصل خراجه
الوقت حاربني بشلف ومصاقيل=والصبر راح ولالقينا نتاجه
ماغير اهوجس وارقب الجدي وسهيل=والضيق عيا لايجيه انفراجه
واسج فالدنيا واجر المواويل=واعاين الواقع بكل انحراجه
واصمت وفي صدري هموم وغرابيل=خايف عدوي لايزيد ابتهاجه
واشوم وابعد عن علوم المهابيل=والحزن من حولي مطوق سياجه
دنيا العنا جتني تسوق المعاديل=في كل يوم اشوف فيها سماجه
دنياً تهان ابها زحول الرياجيل=ويعز فيها الي منول دجاجه
عشنا بها بين العنا والبهاذيل=وشفنا قراح الماء وذقنا هماجه
وحظوظنا غابت ولا به مواصيل=مدري متى تصفى لنا وانتواجه

دنياً تهان ابهـا زحـول الرياجيـل=ويعـز فيهـا الـي منـول دجاجـه

عسى عوضنا في الليالي المقابيل=وألا الزمن هذا زمان الخواجه

المشاركة الأصلية كتبت بواسطة فهيد الرويس (المشاركة 612017) صح السانك ولايهون بن رشيد تحيتي وتقديري