يا سعود حنّا على يمناك= أبشر مدام السعد فالك
حنّا حزامك هنا وهناك=ريّح مزاجك وجوالك
حلالنا والعمر يفداك=يا بن مناور وحنّا لك

الصداقه وصل بيـن الاصدقـى=والقطاعه رمز عن بعد القلـوب
الصداقه عهد عنـد اهـل النقـى=تلـزم الرجـال فالشـدّه ينـوب
فاللـوازم عـن رفيقـه ما اتـقـى=يبذل المجهود لكبـار الخطـوب
ومن يصد عن الجماعه وش لقى؟=لو تعلاّ فوق ماهـوب محسـوب
كانه المخطـي يعالـج بالرقـى=وان تردوا فهو من ضمن القروب!
الرجل في وسط ربعـه لا بقـى=يرتفع قدره بهـم بيـن الشعـوب
كان ماهو عد من جـاه استّقـى=وغاليٍ عند الجماعـه ومحبـوب
ان حضر يحضر على عز ونقى=وان تغيّب حاضرٍ وسط القلـوب
واحدٍ عدّى والاخـر مـا رقـى=واحدٍ جالس على نص الـدروب
والعمر لا راح نصه وش بقـى=مثل شمسٍ هرفت يـم الغـروب
جعل بـرقٍ لمـع حـدرا سقـى=من ورى ريده غشى كل الخبوب
والله اني لاتبعه ونسـى الشقـى=واترك الديره عساهـا لشبـوب
لين اشب النار فـي راس النقـا=وافتح لصدري ذعاذيـع الهبـوب
ديـرةٍ ماهيـب قشـرا ومحقـى=كل ما دفيتها مـع كـل صـوب
انشرح صدري وبالـي روقـى=وتصبح الدنيا لعيني ربـع كـوب
وأهني اللـي خشـع ثـم اتقـى=وأهني اللـي بعـد غيّـه يتـوب
من هقى بالخيـر يلقـا ماهقـى=عند من يغفر كبيـرات الذنـوب
يالله اغفر لـي قبـل يـوم اللقـا=وردني لك رد عن كل الـدروب