ياذيب نادوني على اسمك وانا ذيب = واثر التشابه فالاسامي وفالحال
انته تجر اعواك فوق المراقيب = وانا ونيني تسمعه فأشهب اللال
وياذيب لي حقٍ علاك ومطاليب = يومك تجر اعواك في نايفٍ عال
اعواك يفتح لي عروض ومكاتيب = وياخذ على الخاطر ويسري على البال
اعواك يجلب لي همومٍ مناشيب = بين المحاني راكده يا اقشر الفال
خابرك ما تدري!! وانا ألعنك واعيب = وامن الشتايم يا احدب الناب تننال
تكفى نخيتك لاتزيد المحاديب = في جوف صدري جالها اليوم غربال
ماتدري ان اعواك فيه العذاريب = ايعذرب الهاوي ويطويه فالجال
وانت امتصلط دون شكّه ولا ريب = اتفيّق الغافل وتبليه بخبال
وانت السبايب فالعنا وايضاً الشيب = صبرت مير الصبر في ذبحتك طال
ما تدري اني من كبار المناصيب = واعدّ من بين الرياجيل رجّال
صحيح من قال الزمن ذا دواليب = جالت على راس المولّع تجوّال
اليا ذكرت احبيّبي راعي الطيب = اللي يحوف القلب ماضي ولا زال
اذكر قنا فاجر وشلفا تراحيب = واتراود الافكار فكري وتحتال
ولاغاب عنّي قمت اهندب هناديب = اعدّ شعري والحقه جر موّال
وكل السبايب كلّها عوية الذيب = اللي هل الوقفات تضرب به أمثال
وماني وانا فيصل عطيب المضاريب = ان كان مالرمح الحدب فيه ينهال