ياوطـن كلـن تنعـم بخيراتـك وعــاش=غير انا لاجيت ابي منـك قالـوا ماعليـش
من ثمان سنين ادور على مصـدر معـاش=ولا سلمت من الكلافه ولا حصلـت عيـش
ولا كسبت من الرخاء لا جلال ولا قشـاش=يوم بعض الناس لا راجع حسابـه يطيـش
ياوطـن مابغـى زيـاده ولا شـي بـلاش=بس ابي لي ياوطن مثل ما لاحمـد خريـش
من هموم الديـن عفـت المخـده والفـراش=حازمن بطني وصابر ولا احد قـال ليـش
ليش يلحقني ظمـا فيـك والدنيـا رشـاش=ليش اجوع وكل الاسلام من خيـرك يعيـش
ياوطـن لـولا محبتـك ماطـال النقـاش=سقت رجلي واستعديـت للـدرب الوحيـش
مير اشوف ارضك بساتين وانجومك فـراش=لين صرت امشي على الشوك كني فوق ريش
ايه احبـك والاوادم تحـت ستـر القمـاش=يوم بان العيب والغش في القلـب الغشيـش
كم ضعيف راح يطرد ورا ضـوء الفـلاش=واستباح مسامر الخمر واستهـوى الحشيـش
مايبيعـك ياوطـن غيـر لاش وابـن لاش=والملوك يميـزون الاصيـل مـن الكديـش
دام حكامـك هـل الديـن حـدك ماينـاش=وكلنا لك ياوطـن ساعـة الشـدات جيـش
ياوطـن ودي بشـي يساعـد ميـر مـاش=والسنيـن تمـر والعمـر يسرقناشـويـش
بجاه من ثبت ركونك عقب ماهـي هشـاش=من سكاكـا للحسـاء للحـرم لبـو عريـش
وجاه من والاء مسيره بعزم وربـط جـاش=جاه ابـن حثليـن وابـن محيـا والدويـش
حطلي نقطة بدايـه وعطنـي منـك كـاش=دلني واظمن لي العيش ولا احياء من ايـش
والختـم كـل تنعـم بخيراتـك وعــاش=غير انا لا جيت ابي منـك قالـوا معليـش