ياهل المغاتير القداما والجدد=شدوا محازمكم تراكم في حرا
منقية اللي لاحضر وقت الوعد=تفخر به الهيلا ليا رد البرا
ورد وابن فراج مطلق لاورد=يشرب بيمناً ماشكت قل وزرا
شيخٍ لربعه لابدا اللازم سند=يطري عليك الغيث لامنه طرا
يفرح به اللي طول ليله مارقد=وجده قليل وحمله اثقل من كرا
له مجلس معروف عند اهل البلد=ومعروف للي ماسكن في ام القرأ
ماينقفل بابه ومن زاره وجد=العود الازرق والدلال منحرا
وصيــنيـــةٍ تكحل عيون أهل الحسد=فيها عيال البل وحيلٍ عقّرا
وان حك عودٍ عود وقفاته مدد=يرفع لواء ربعه ولايرجع ورا
تباشروا يالاد عاصم بالسعد=ابو محمد طب فى الوضح وشرا
يجمع خيار الشول مايجمع عدد=من كل منقيه يحوز الندرا
اليا لقا اللي مابعدها مابعد=اية جمال من الخفاف اليا القرا
يم السحاب الغر غاربها صعد=ماكنها تمشي على سطح الثرا
بالمال والهمه وعزمه والجهد=يستاقها وعيون راعيها ترا
شيخٍ تولع بالغوالي واعتمد=على الله وكوّن مطيرت الكرا
وضحٍ يشادي لونها لون البرد=والا وميض البرق لامنه سرا
جرد الرقاب اللي لها المنصف شهد=فج النحور ام البطون الضمّرا
لاشافها الجمهور قام ولاقعد=وراع الولع صاح وتوجد مادرا
قدامها المواط حلال العقد=وقبايل عتيبه معه تمشي برا
من شافهم لو ماهو بشاعر قصد=وعادة به الذكرى لوقتٍ قد جرا
حنا هل البل يوم الامه في كبد=ويوم الحرايب دايره حنا ترا
ماننزل الدار الحيا في وجه احد=هيباتنا لبواشنا ظل وذرا
وقتٍ مضى واليوم في خير ورغد=وكل السعوديين فى الدار خشرا
في طاعة الله ثم ملكنا نتحد=شعب ورجال أمن ومشايخ وومرا
وعلى المحبه يوم ابو فيصل رصد=جوايز معزي بنينا فى العرا
في الموعد اندق الوتد جنب الوتد=تنافس اخوان وعواني وقصرا