سلام الله سلام البادع الطيّب عريب الجدّ = هذاك اللي كسب ودّ الخلايق واكسبوا ودّه
ترا الحاكم حكم حكمٍ على حاكم يجيب الردّ = وحكم الحاكم إليا من عصا حاكم حكم ردّه

هلا يامرحبا والطيب يالروقي يبيله حد =ولايمكن نسم الطيب / طيب ان زاد عن حده
يقولون السيوف انواع ابو حدين وابو حد =وعهموج انشدو عنه الدجيما وش كبر حده؟

يقولون العرب هدّدت برج المملكه بالهدّ = وبعد ايام قالوا ضاعت علومه ولاهدّه
تبا تعرف كبر حدّه عن اهل المعجزات انشد = وتلقى العلم (( نعم السيف وقت الحرب والشدّه ))

مزاج الحر هالايام ماهو صافيٍ للهد =واشوف الخرب يكفخ بالجناح يدور الهده
اثر قلب الدجيما حي ينبض.. بالوفا والود =ولا هو ذابحه غير الغرام اللي ذبح جده

انا خابر حكيم الشار يفرّق فالمزِح والجدّ = وهالحينه بلشنا راح مزحه نسخه لجدّه
انا جدي ورد عدّ المراجل والحفيد اعتدّ = يبا يارد على عدّ الجدود ,, وزهّب العدّه