العمــــــدة=
عشان الصورة اللي حمضت في معمل التحميض=عليها الفني اضفى لمستـه وابـداع تصويـره
تجلت مشكلة ما بين قسم الطـب والتمريـض=وكلن جاب طبق اصل الشهادة معـه والسيـره
سلطان بن دحيم=
عمى الالوان حده لين حط السود مثل البيـض=وحصلنا خطاء واضـح وبيـن فـي تقاريـره
ويمكن فيه ناس(ن) من هل الارهاب والتحريض=يوصونه على عكـس الحقايـق يالله الخيـره
العمــــــدة=
طبيعة ساحرة ما تقبل التطويل والتعريض=لو انا ما نسينا واجب الاسلام والجيره
فصول العام اشد ايامها يوم الشتاء والقيض=وفيها يعرفون الفرق فالدولار والليره
سلطان بن دحيم=
اغني هيض يالعمده ترا ما جيت اغني غيض = ترانا كل ابونا يا وسيع العرف في ديره
لو يزينكم الحلاق بكريمات للتبيض = ما تنفعكم كريماته ولا تنفع تدابيره
العمــــــدة=
تزينـّـا اللحا واشنابها واللي معه تفويض=دخل قصر الرياسة والشقاوي صابته حيره
وطا منزلك سيل العرم لكن دور التعويض=انا مما جرى لك بين تهليله وتكبيره
سلطان بن دحيم=
ترا شرحك سرا ياللي من الفرحه ما عاد تريض = مفاتيح القصر ماهيب مع عامل بتأشيره
يا عايض روح ود العلم لخوانك عوض ومعيض = ترانا في غنا والسوق لازلنا هواميره
العمــــــدة=
خبير البيت الابيض معه عرف يوصله ويفيض=يعرف الموتر اللي لا سرى تقرع مساميره
تجارة نصف تجار الجزيرة فالبصل والبيــض=وواحدهم سبايب نكبته من قل تفكيره
سلطان بن دحيم=
حصل لك تذكره فالنقل يالعمده مع التخفيض = وكل السالفه يا صاحبي لفه وتدويره
ترا ما هوب حنا اهل البصل والبيض والحميض = صرفنا لك ذهب وشبك تقابلنا بقصديره
العمــــــدة=
خفيف الوزن في قلبه جروح منقضه تنقيض=يطير مع الهبايب والجبل محفـوظ تقديـره
لو انّا للسباع الضارية ما نحسن الترويض=غدينا لقمـةً يوخـذ بعدهـا راس تعميـره
سلطان بن دحيم=
بعد ما ارتج راسك يا رعد من قوة التنفيض=ما عاد نعاتبك لو قلت اشيل طويق واديـره
يا كثر اللي قدم وجه السباع مربضه تربيض=هذا العلم الصحيح ولا تدور يا ولـد غيـره
العمــــــدة=
ترومش بالعيون وتكثر التفتيح والتغميض=مهولك العيار اللي وصلك بقـوّ تفجيـره
تخض البحر لكن البحر ما يقبل التخضيض=ومن عاند بحر يا صاحبي تكثر مخاسيـره
سلطان بن دحيم=
بعد شفت الثعل قدمي يعرض يا عرب تعريض=رميته ما قصدت الذبح قصدي بـس تعزيـره
انا حافظ يا عمده روح حفظ من يبى التحفيظ=وتدر ان البحر ترسي على موجـه بوابيـره
العمــــــدة=
سهود مهود دار الشاوي اللي ليته معه حظيظ=عشان يساعد اهل المعرفة في سرع تطويره
تحت جور الليالي والسنين تقرضك تقريـض=تبا تاخذ عرب وانت بدويَ يشعـب بعيـره
سلطان بن دحيم=
الا يا زينها قدم الرجـال الحظـك تلحيـظ=وقلي من هو اللي طورك لعلـك الطيـره
نويت انهضك مير المشكله ما ينفع التنهيظ=ولكن انثبر من يوم فكـرك تـم تخديـره
بيض الله وجيهكم
ابدااع
وفتل ونقض من الطرفين
هذا الطاااروق
ارشحه للمميزة هذا الاسبوووع
العمده
سلطان
صحت السنتكم.
