سلام مني على شبابة النار=اللي كرمها يشرف مجتمعها
مستور عنده علوم وعنده اخبار=سمعتها مير غيري ماسمعها

يامرحبا ياهلا حشمة ومقدار=الناس في وضع وانته ماانت معها
يالله تحفظ لنا الدار وهل الدار=اللي منول زمن محدآ طمعها

لاوالله الاعيون الجار للجار=واللي يشوف السلامه يتبعها
اخذ الحذر ثم لد يمين ويسار=واهل السنع ما تغير عن سنعها

حنا عرب مثلكم وندوس الاخطار=وليا حصل هوشة محدآ فرعها
أظنّها سالفة عنتر مع الثأر=من لا عرف قدر نفسه ما رفعها

قدام لا تكثر هواجيسك وتحتار=الارض ماهوب ضايق متسعها
إن قاله الله نحصّل خير الاشوار=ونثور القنبله فاللي صنعها

الشار ما ينقصر عن محكم الشار=واللي يوصل حباله ماقطعها
نبي ندير الرحا مادام تندار=لقمة ونشبت بحلقه مابلعها

الشور يبغى عرب عقيل وكبار=اصغرهم اللي ضروسه قد قلعها
ماهوب لازم نبين كل الاسرار=اللي يبا نفعة آصحابه نفعها

ياصاحبي يالعزيزي يدك والحار=ترا البديعه تضر اللي بدعها
عساك ياجارنا ماجور ومجار=لن كان ماناسبتك الدار بعها

الحار بينك وبينه عد الامتار=وام الوجع كيف نأمن من وجعها
ياجارانا خابرك ماانته بمكار=لا تعطي الناس كلمة وتخدعها

ما نزرع الشجره اللي مالها أثمـار=اللي ليا مرّها الطرقي قلعها.
احسب حسابك مادام الوقت دوار=الناس هذا الزمن زايد طمعها

لو إن يوجد ثمر في كل الاشجار=كلآ إن على مايبي قام وزرعها