حاكم الغنامي
في السيره الماضيه لسعود سجيت =ياعنك الك سيرةٍ ماهي حميده
ان شان وجه الزمن مني تبريت =وان زان قلت السبر مثل القعيده
سعود البرقاوي
انا احمد الله من اهل المجد والصيت = ما اسمع علوم آهل صنعا والحديدة
لاشان وجه الزمن مديت واوفيت = وان زان قلت آنت رجالٍ وليدة
حاكم الغنامي
قحطان عندي سوى من نجد ل/حفيت =ماعرف وجيه الجحادر من عبيده
بين القمر والمجره ويش سويت=بيتٍ حفظناه من عرض القصيده
سعود البرقاوي
حنا عتيبة لنا عملة وتوقيت = وكلٍ تجيه الرسايل في بريده
طرحت نجم السويبع ثم قفيت = واخذت من عقبها حاجة جديدة
حاكم الغنامي
قصتك ماغطها لوكان غطيت =كتبتها في المجله والجريده
النجم سلطه على روس العفاريت =والقلب ماعاش لو قصو وريده
سعود البرقاوي
لاطالت السالفة ماكني اوحيت = آصد عنها ونظراتي بعيدة
وش دبرة الضلع من فعل الدناميت = ان كان طقت حديدة في حديدة
حاكم الغنامي
مخطي وتمشي جري ماكنك اخطيت =فريد ياسعود وعلومك فريده
في فيته ياسعود اصبحت وامسيت =وان شفت عساس قلت الدرب سيده
سعود البرقاوي
على التهايم برجليني توطيت = عندي قناعة ولي دين وعقيدة
راع العشا من صحونه وش تعشيت = آكلت من بكرته والا هريده
حاكم الغنامي
ان كان دينك كذا ...لاوالله اقديت =تختل شعيل الضحى وتفك قيده
حجوا هل الجيش وانته وين حجيت=ياللي تلد النظر يم الفقيده
سعود البرقاوي
دخلت فالمسجد الاقصى وصليت = والا انت معروف يامطوع بريدة
لاتحسبنك من العلة تعافيت = باقي لك ايام وشهورٍ عديدة
حاكم الغنامي
عن واجب الرب ماملت وتحاديت=حاكم خلق عبدله وانتم عبيده
ياللي تدور دروب المجد وازريت =ابعد دروبك عن دروب المكيده
سعود البرقاوي
مدام حاكم موردها على هيت = ما نيب قايل ياكود الله يزيدة
حسبي على ابليس هو راس الطواغيت = يضحك بهارون ويبّكي زبيدة
حاكم الغنامي
اعرفك لاطالت الطرقه وحنيت =العلم الاول تبا ترجع تعيده
ابليس يرجم ويبعد كان سميت=المشكله فيك يالماكر عضيده؟!!!
سعود البرقاوي
اقول من يوم مريت وتعديت = لاصادك الوقت ماتقدر تصيده
ابليس يهبى ياحاكم وانت بلفيت = ابليس جدك وصرت انته حفيدة
حاكم الغنامي
اهرج ومسموح كان اليوم زليت=ماينقص البنك لو تشذب رصيده
اثرّك طامع بحقل الغاز والزيت =وتغش نفسك وانا نفسي شهيده
سعود البرقاوي
آهرج ولي قصد يوم أخذت واعطيت = راسي معاند مع الروس العنيدة
من يعرف الفرق بين مرات وكميت = يمد كفه على قدر العصيدة
حاكم الغنامي
سر القدم والوعد لن كان دليت =نكتب على العايره جمله مفيده
لو انت من جرحك المزمن تداويت=ماكان يمشي على وجهك صديده
