يالله يامنشي السحاب المراجيم=طالبك يم مصدّه إنك تصدّه
ياخذ ليالي ممطره كلها ديم=سيله حقاق وكل عقمٍ يهدّه
على الهضاب الراسيات الشغاميم=وكل العبال اللي بحدوى مصدّه
وتزود حول اللي عليها المراسيم=شامه بخد النايفة يوم أعدّه
والعشب عقبه ماحسب للأناسيم=لجاء الصباح تشوف زوده ومدّه
تشبع بها صفرٍ وعفر ومجاهيم=واهل الدبش ينسون جور المكدّه
ديرة رجالٍ دايما بالمقاديم=من هدي خلاق السماء مستمدّه
رجّالهم للمرجلة دايم مقيم=يبحث عن الجزلة ولاهي تسدّه
يرخص حياته بالملاقى اليا سيم=إن قابله وإن كان بيكون نِدّه
لجاهم الطرقي بلش بالعوازيم=كلٍ اليا سلّم على الضيف شدّه
والطيب فيهم مايبي زود تعليم=وهبه من الرزّاق محدٍ يردّه
جعل الدويلة عزّها دايم مقيم=في ظل من بالجود ماشفت قدّه
والشيخ بن جامع له زود تكريم=حب ووفاء وضد منهو يضدّه
وقبلي بها صعينين غنّا ولا لِيم= وراعي تهامة باح مكنون سدّه
بآخذ مع الظفران بعض الأقاسيم=واثني على أهل الطيب واهل المودّة
وصلاة ربي مع تحيّة وتسليم=على مبيّن شرع ربي وحدّه

مر السحاب وكل عين تراعيه=رعده يصيح وبارقه ما استراحي
كل يروف له وكل يناديه=وقامت على وبله نيام البراحي
فزت على شوفه عطاشى صحاريه=وصم الصفا اللي من عنا الوقت طاحي
كل بدت تحيا بشوفه امانيه=والليل يستبشر قدوم الصباحي
حتى معاويد السواني تناجيه=شامت لبراقه رقاب الطياحي
أرخى هماليله وزاد الرجا فيه=وكل تعشم فالشراب القراحي
وقدام لا يمطر ويسقي ظواميه=هب الهبوب وفرقته الرياحي
الله وكبر ضيع الحلم راجيه=ودر الغمام اللي على الخد ساحي
وكل رجع في همه اللي يعانيه=وكسر الجناح ولا بقا لو جناحي
أخيرهم من كن حزنه بخافيه=هذا يصيح وذاك زاد النواحي
واللي نظر في حال غيره يعزيه=الحلم ضاع وزودن الجراحي
كل بكا لحظة فراقه لغاليه=يكود أنا ما دمع عيني سلاحي
أصبر ونا قلبي به النار تكويه=وخطي عليه ولا طلبت السماحي
مانيب من يطرد سراب ويرجيه=أموت وحيا ما رجيت الضحاحي
ألا ليا نامت يديني بياديه=دمي يحلل له وذبحي مباحي
قلبي رماح الود ما هيب تخطيه=ويا حبني لطعون هاك الرماحي
رجاي فلي مابعد خاب راج=مده ولا مد اليدين الشحاحي

جبرني على الفرقا زماني وقلبي هـش=ونا لو نسيت اللي جبرني على الفرقـا
ألد النظر يم الشجر كودي ألقـا عـش=وتكسر ضلوعي كل ماناحـت الورقـا
أحس إنها تبكي على شيء ما ينخـش=حسافه على رجم لهـا كايـد المرقـا
تمايل مع الأغصان ما عاد تجمع قـش=وتوجد لو إن الوجد ما يحيـي الغرقـا
تخيل البروق وقسمها من سحابـه رش=وتبي اللي على وضح النقا ما تبا الدرقا
لك الله عيون دمعهـا للوفـا مـا نـش=لو الذكريات الماضيـه طعنـة زرقـا
ونا لو شكيت من الليالي بصوت جـش=ما توحيني اللي للمشاريـه مـا ترقـا
يقدر ظروفي واحد مـا بقلبـه غـش=وتضاحك خشاش الأرض وقلوبها حرقا
ولا ياغريب الدار والجرح مـا ينبـش=مهيب الجروح اللي من الجادل الطرقا
لا والله طعون دمعها وبل مـا ينمـش=ولا هيب تشكى ألا على طيب العرقـا
عليه السلام ودام تقـدر تمشـي مـش=وحي يبـي فرقـاك حـي الله الفرقـا