ابو لمار

ابن سرحان جاب العيد قبل العيد في التلفاز = ووقت العيد عيّد جوف دار" مالها بابي
وكل الناس شافوا صورته جالس على المركاز = بلى نفسه غواه ابليس يوم اغووه الاصحابي

ابن سرحان الثبيتي

بعد خليت قرصك ياعميلي في يد الخباز = ليا منه حداك الجوع لا شوفك تعزوابي
وانا لن كان لي صوره تمثلني فهو انجاز = على وضح النقا ممشاي دايم وانته ادرابي

ابو لمار

رحمك الله يامفتي المملكه ياشيخنا بن باز = لو انه عايش" يفتي بذبحك ذبحة الدابي
يابن سرحان ماشا الله فهمت العلم مايعتاز = تبا تسري بحمل اشعيل بعد النور ماغابي

ابن سرحان الثبيتي

على درب التقدم والتطور لا تصير انحاز = بني سفيان دايم يحسبون البيج عنابي
ولن ماطعت فرسان الوغا ولا عطوك القاز = انا ماقلت لك لا تعترض في درب مشعابي ؟؟

ابو لمار

معك بندق تثورها بدون اعيار للانواز = تشوف انواز مير البندقيه رميها هابي
انا الليله بشهد فوقك النشمي وابو فواز = ومشعابك على راسك يجي من عند الاقرابي

ابن سرحان الثبيتي

ليا كان الدليله فالخلا مشيه على معكاز = نويت استخلف الله ياوجيه الخير فاتعابي
الك عادة ليا بارت عزومك جيت بالالغاز = على قول المثل مدري غبي ولا انت متغابي

ابو لمار

عسى الله مايضيّع لك تعب يالشاعر النقّاز = وش اللي متعبك وانته مشيت الدرب متحابي
عزومي ماتبور اليا لقيت الشاعر النهّاز = مدام انته نسيت العلم ليش اتصيح وتبابي

ابن سرحان الثبيتي

بغيت احمض الك الصورة اللي مالها برواز = وتحت الخط الاحمر سالفه ماشدت اعصابي
ولكنك عجول وللدروب الهينه .. منحاز !! = يشيب القاف في عينك وهو لا زال عزابي

ابو لمار

تروح السالفه عند النشامى مالها عوّاز = لكنّ المقبله حاسب لروحك واحسب احسابي
انا بنصحك علّق صورتك في برحة القزّاز = وقول انا من اهل الشعر والشعار منصابي

ابن سرحان الثبيتي

تبا مني تفاصيل الخبر ولا تبا الايجاز = اثرهم ظالمينك يوم يقلون انك ارهابي
وانا بنصحك تحفظ صورتك دام النفوس عزاز = بعد بكره تقول ابك الثبيتي ويش سوابي