الهيـــــــــــــلا *** منتدى قبيلة عتيبة

العمده

يا مركز السيل ألحق الدباب=عان البلا في جيب سواقـه
عدى شبيب وفات من شبّاب=عريبيا تشكي مـن الفاقـه

معجب العتيبي

قدام عين العسكري ماغاب=لو سكر البيبان والطاقـه
وعريبيا مايحسبون حساب=للي حياته ضحك وطفاقـه

العمده

ان كان شفتوا حملة النصاب=وشلون ما شديتـوا وثاقـه
الثعل ما يلعب باسود الغاب=يا جاهلين الفحـل والناقـه

معجب العتيبي

لاتطرح المجرم بوزن ذباب=خله وراقب واطرح رفاقـه
ترا الاسد لاطلع الانيـاب=لاتقول يضحكلي وتشتاقـه

العمده

لا فات منك الفوت راسك شاب=وامسيت ثوبً فـوق علاقـه
لو كنت نايم قلت نومك طـاب=مصيبه انك كاشـف اوراقـه

معجب العتيبي

دام السما فوقه وتحت تراب=يبطي وطعم النـوم ماذاقـه
صاحي معه واثبّت الاسباب=عشان مااندم ساعة احراقه

العمده

لولاي رحت لمجلس النواب=يمدي ولد بقعا ركز ساقـه
يا استاد لو فكيت للطـلاب=مدخل صغير يصعب اغلاقه

معجب العتيبي

ماني بخابر عمده ونصّاب= يامال فرقا العين وفراقه
نصيحةٍ حلوه وفيها عتاب=والناس للاسلوب ذواقه

العمده

طمن فوادك من رماح ذياب=بينك وبينه حلف وعلاقه
والا لو انك من فريق اجناب=لابد راسك تكثر افلاقه

معجب العتيبي

ماهمني حاضر ولا غيّاب=قلبي يكررها من اعماقه
قدام عيني تقصر الاشناب=والخصم يطربني ارهاقه