سلطان الجـذع

ياليل ياليل ياليل .. طاب اللقا والسمر طاب = تبا تقر الموازين .. بين العميل وعميله
ياما بكينا هل الخيل .. سعدون وعقاب وحجاب = لكن يادمعه العين .. الوقت مافيه حيله

مقعد الدغيلبي

الليل ليل المواويل يامفتلٍ روس الاشناب=للسيف مقضب وحدين ..لهل السيوف الصقيله
الدمع فوق المناديل..كله لجل زيد وذياب=واليوم ياعام الالفين..الوقت مجنون جيله

سلطان الجـذع

العام ياصاحب هذيل .. ليه قفلوا دونك الباب = أثرك مطية شياطين .. تشعبك في كل ليله
خليت روس الرياجيل .. مجرية كل من هاب = وأصبحت بين الفريقين .. مع درب مومي شليله

مقعد الدغيلبي

مالك عليه مداخيل ..لو تعتلي راس مرقاب=وانكبك نكبة فلسطين..والحمل تعجز تشيله
هذي قديمه على النيل..والمخ مركز للاعصاب=وضعك يبي زود تحسين..يابو كفوفٍ بخيله

سلطان الجـذع

شافتك بعض الدرابيل ... غريب في سلم الاغراب = وينك يامقعد وانا وين ... حضر لعلمك دليله
ماني براضي لك الميل .. لكن ياكثر الاسباب = واللي غدت من زمانين .. ماعاد فيها عقيله

مقعد الدغيلبي

جتني علوم ومراسيل..واليوم ماعنك مجناب=سلطان طالع سليطين..من تحت برق المخيله
مانقبل الذل والميل.. لآكشرت روس الانياب=يومن حبك غدى طحين..وسط الرحاه الثقيله

سلطان الجـذع

هرجٍ بليا محاصيل ... بعده مناقيد وعتاب = لاترجع يسار ويمين ...الحمل حملك وشيله
اعرف عصي الجماميل .. ماعدلت عوج الارقاب = حرااااااااام بعض البعارين ... يمشي بوسم القبيله

مقعد الدغيلبي

حنا هل البن والهيل..للهيل والبن شراب=ياللي تحرث السكاكين دمك عرفنا فصيله
تبا تروح محاميل..والسيف قصاف الارقاب=واشهار كله مجانين..وانا زبون الاصيله

سلطان الجـذع

الاول من الفناجيل ... عندي مع أصحاب وأجناب = يالحنظل العرق فالطين .. لو جتك غصونك طويله
أقول روح بك السيل ... أن كان ظن العرب صاب = يرجع لك الصاع صاعين ... واللي تكيله نكيله

مقعد الدغيلبي

الجدي مايشبه سهيل..والجرح ينزف ولاطاب=شف معركة بدر وحنين..والوقت لاتشتكيله
اقول خل الاقاويل..وانته ياسلطان نصاب=تجلب بضايع من الصين..والصدق ماتنتميله

سلطان الجـذع

ياشاردات التماثيل ... صفيت مع مقعد حساب = وباقي له حساب بعدين .. ان قاله الله يجيله
لو يطلع النجم ابو ذيل ... الصقر مايرجع غراب = قلت لك مره وثنتين ... خل العلوم الهزيله