الطيب تعرف خوته مع هل الطيب=له خوة تروى وقصه طريفه
وسموا علاه منزحين الاجانيب=علم موكد والحقايق منيفه
وكم من شجيع والسوالف مهاذيب=قالوا هذا ذيبان والا وصيفه
ومعاهدك ياذيب بالسر والغيب=انك بامان وخل نفسك خفيفه
حنا ترى ياذيب عند المعازيب=حكام نجد اللي بلدهم امريفه
اترك علوم مشيلين المشاعيب=مايحتم الميقاف ناس اضعيفه
جبتك لحفل مكملين المواجيب=ساس الصخى يوم الليالي كسيفه
في محفل الهيلا لعوج العراقيب=مضيفهم وان حط كل مضيفه
مهديك للي يحتمون المطاليب=للضيط بدر ولا لحقني حسيفه
ملجألمن جاله ظروف وعواقيب=واللي حداه الوقت عيده وريفه
تراه راع السيف والماقف اصعيب=ياذيب ابوبندر وعمهوج سيفه
لياقنبت بعالي الصوت ياذيب=كنه قنيبك يوم يوصف وحيفه
سيف الشيوخ معطبين المضاريب=من كف اهل عمهوج كنه قذيفه
مروين حد مصقلات المحاديب=فوق الاصايل بالسيوف الرهيفه
لاطار ستر مخبيات الرعابيب=في ساعتن فيها المنايا مخيفه
كم ليلة عشوك من شمخ النيب=صم الرمك وملاوحات السفيفه
وكم راس شيخن في الليال المعاطيب=عشوك راس الشيخ والا رديفه
من دون وضحا لبسوها دباديب=كسب لهم يوم السنين العجيفه
مالي هدف والحق ماعنه تجنيب=شهادة التاريخ فوق الصحيفه
بينت معنى القاف فوق المكاتيب=الشعر معنى والمراجل كليفه
وحمض النشاما بصامل العلم ومصيب=وعلم بلا معناه ماله خليفه