أول استبداي باسمك ياحنــون= ياكريم ما تخالفه الظنون
امرك المحفوظ في كاف ونون= وانت لي في كل مغواة دليل
هيج اشواقي حمام في الغصون= بات ساجع في بديعات اللحون
بين تغريد وترجيع يهون= مادرى اني في الهوى مثله عليل
ياحمام الدوح هيجت الغرام= ما سبب نوحك ومالك من مرام
اعطني عهدك وخذ مني ذمام= بيعني شوقك وخذ شوقي بديل
ان في قلبي جروح ماتطيب= مابدت حتى يداويها طبيب
من هواجس جات من فرق الحبيب= باح مكنوني وصبري مستحيل
كلما هب الصبا قلبي صبا= من غزال في الحما فاق الظـبا
ظبي جازي يرتعي نبت الربا= يسلب العشاق بالطرف الكحيل
مال عني بالتجافي والصدود= مابقي غير الحسايف والوجود
كم رعيت النجم والعالم رقود= والمحاجر دمعها الصافي يسيل
زارني طيفه كما طيف النسيم= جدد الاشواق والعهد القديم
وانثنى في داجي الليل البهيم= قلت زدني قال يكفيك القليل
آه من هم شوى قلبي بنار= وان طلبت الصبرماالقاله قرار
كيف ابا صبروالحشا للهم دار= صار مالكني وانا عنده نزيل
قمت مما حسني عند الهجوع= يوم كل نام ولعت الشموع
والهواجس جاتني تمشي جموع= مثل ورد النحل في وادي طفيل
أو كما سيل تسايل من مضيق= يقلع الحيطان والسد الوثيق
يأخذ الاشجار ويسد الطريق= زاد عن حده وضاق به المسيل
طار نومي يوم نامت كل عين= بت ساهر مع نجوم الفرقدين
من هواجس من جفا من جور دين= ما بقا الا البعد عنها والرحيل
صوب ارض الشام أو ارض العراق= عل يوم فيه ينحـل الوثــاق
كم نقاسي والقسا مر المذاق= ربما نلقى عن المنزل بديل
دع بلاد الذل وارحل يالبيب= واغترب فالكل بالدنيا غريب
القضا مكتوب والداعي نصيب= اركب الاخطار والهول المهيل
وان جفتك الدار أو مال الزمان= لاتعيش بدار ذل أو هوان
لو يظلي نبتها من زعفران= صاحب الاخطار واجعلها دليل
شد عن ارض الاعادي والحسود= واطلب العليا وبالغ بالجهود
لو يكون العز في غاب الاسود= خير من دار تعيش ابها ذليل
كل من رام العلا يرقى لهــــا= سلم الاخطار في اهوالها
من تراخى عزمته مانالها= دونها يقصر الباع الطويل
اقطع البيدا على عوج النضا= لو يكن تمشي على جمر الغضا
ما يفوت العمر قدام القضا= دين عندك لين ياتيك العميل
عاشر الاحرار من اهل الرتب= تستفيد العقل منهم والادب
حيث هم اهل المروة والنسب= واترك الانذال ما منهم حصيل
سل عن الجيران قدام النزول= وان سمعت الناس تهرج لاتقول
تكتسي ثوب المعزة والقبول= والخلايق يذكرونك بالجميـــــل
كم كلام راح في نقله نفوس= وانت ماتاخذ على نقله فلوس
لاتفتش كل حب فيه سوس= كم تخوض الناس في قال وقيل
صون عرضك من ملاغات السفيه= واترك الكذبان سودان الوجيه
من حكى عنهم يعود الكذب فيه= كيف تاخذ هرج من باير هبيل
اترك البيت الردي وانص الرجال= خذ عريب البيت من عم وخال
يوم تنظر في ولدها كالهلال= وان مشى بالدرب ما يغوى الدليل
خذ عزيز البز من زين القماش= والردي لو كان يعطونك بلاش
ما يفيدك كيف تاخذ شي ماش= بيعة المغبون منها يستقيــــل
دور الطيب لو وغال الثمن= لو يكون القصد في صنعا اليمن
لا تغرك صقلة الوجه الحسن= ابذل المجهود بالمال الجزيــــــل
الذهب ما يخلطونه بالنحاس= غير بعض الناس ما عنده قياس
خذ نصايح ما حواها بو نواس= مثل نظم الدر واللولو الأصيـل
وان ملكت المال لاتغدي شحوح= اطعم الجيعان واكسي كل روح
الدبش والمال لابده يروح= والثنا والمجد جيـل بعد جيـــل
هم روحك واغتنم عصر الشباب= ان للأيــــام مــــيل وانقـــلاب
ونت فيها تنطــوي طي الكتاب= لاتغرك صحة العمر الطويــل
اترك الدنيا ليا جاتك ضحوك= لا تغرك بالملاعب والشكــــوك
كم غرر فيهــا وكم غرت ملوك= ضحكها غرار ما اسرع ما تميل
والعدو لا تأمنه لو بعد حين=لو حلف بالبيت والركن اليميـــن
الحقد والبغض في قلبه دفين= وان ضحك بالوجه قلبه لك غليل
خل عنك الكبر فالله الكبير= لا تحــاقر عـاجز والا فقيـــــر
واعلم ان الأمر للــه الخبير= يقصم الجبـار ويعـز الذليـــــــل