| معجب العتيبي |
07-Jun-2009 12:01 AM |
علي فلاح العضياني
يا بندر المرشدي وسّع ضميرك خاطرك لا يضيق=ترى المعازيب يا بندر تحطّ الضيف بعيونها
صعبه تعوّد بعد قطعت يا رجّال نصف الطريق=الهقوه الطيبه خلّك وراها لا تجي دونها
بندر المرشدي
الوضع هذاه مرزي والله إنّه ما يسرّ الصديق=و أنا بدوي و الحضاره ما تغيرني بقانونها
لازم نحسب المكاسب يالعتيبي بالحساب الدقيق=بعض البضايع رديّه لا يغرّك لون كرتونها
علي فلاح العضياني
النصر جابت له الإداره العليا مدرّب فريق=و اليوم فيه الجماهير العريضه خابت ظنونها
سوق التجاره مع الايام يا بندر ينام و يفيق=و إليا بغيت الثمينه يالعتيبي سوق عربونها
بندر المرشدي
أزرى يصلح عبيد أفريقيا ما بين طق وطقيق=والا الجماهير ما تدري عن القصة ومضمونها
بعض البضايع تراها في مقامي ياعلي ما تليق=ميزت ما في قلوب الناس لو تضحك لي اسنونها
علي فلاح العضياني
أثرك ما انته على مانيب خابرك ,,, أثر خبري عتيق=اليوم نفسك ليا جات المواقف ,,, باح مكنونها
رفيقك اللي تقول إنّه يابو سلطان نعم الرفيق=بينك و بينه علومٍ تاليتها مختلف لونها
بندر المرشدي
انا ليا أعطيت كلمة شب في وسط الضماير حريق=وانته تسج القدم مع عالمٍ مثلك يسجونها
ترا الجمل ما يحمل يالعتيبي فوق ما لا يطيق=حكم القدر يخلع ضروس الرجال ويطرح متونها
علي فلاح العضياني
حنّا على علمنا و الله على أسرار الضماير مويـــق=صحيح مال اللزوم الاّ رياجيلٍ يسدونها
لا تعتذر عنه و أنته معك يقطع كل حبلٍ وثيق=بكره يقابلك بأعذارٍ تجيك تعدّ طبلونها !!!
بندر المرشدي
بالله واد الرمة وش جاب سيله يم واد العقيق=هذا مثل وانت تعرف ويش ظاهرها ومكنونها
يبقى الذهب هو ذهب ما عاد يذهب له لميع وبريق=لكن قفل على بعض البضايع وسط ماعونها
علي فلاح العضياني
يا بندر المرشدي و الله لو نرميك فالمنجنيق=المنتدى يزدهر ما تمشي أوضاعه على هونها
اليوم دمّك خفيّف يا ولد مرشد و جسمك رشيق=و أمس العصر معك نفسيّه و روحك جنّت جنونها !!!
بندر المرشدي
تحمد الله وقل ياسيدي .. والا تظلي سليق=قدمك هنا عالمٍ يالاجودي طلعت كربونها
انا احسب انك لــ(صلفات) الروابع يابن عاضي عشيق=مار اكتشفت انك تهل العباير يوم يطرونها
|
