شـــلـــهوب

بالسلّم الأبجدي سلام ردّه من صميم النظام=رتبتها بالنظام المعتبر والسلّم الأبجدي
يابندر المرشدي من غير لا كثّر عليك الكلام=تعال وإخذ لك درس ٍ فالشعر يابندر المرشدي

بندر المرشدي

من هجس ما له لديّ يامرحبا باللي يرد السلام=فالمنتدى إلليّ على الطالات والاشعار ماله لديّ
ياشاعرٍ مبتدي ... إنا مع الشعار مثل الإمام=اشرح لنفسك دروسك وافتهم يالشاعر المبتدي

شـــلـــهوب

والله لاقول بعدي.. معنى وخلّه مثل راس النعام=اتحير معه أكثر عقول البشر.. وأقول لك يابعدي
الفرد بالمجندي.. ماتقتسم في حزّة الإقتسام=لو أقتسمتوا خطابات الشكر.. فردي وذا مجندي !

بندر المرشدي

أعن الهدف ما احتدي كأنك رسمته يالمسولف تمام=ماني مدور عن الوقفة عذر دون الهدف ما احتدي
تراك مثل ولدي واجب عليك السمع والاحترام= في بعض هرجك ترا مالي نظر وانته سوات ولدي

شـــلـــهوب

بندر وقع في يدي وإن ماهداه الله عليّ الحرام=ليصير عبره من كبار العبر بعد وقع في يدي
ياعود مانتب ردي والحجه اللي ماتفضّ الخصام=مايرتفع سهمها ينزل حدر لن كان مانتب ردي

بندر المرشدي

ماهوب غصنٍ ندي في يدك جمرٍ ذاب منه اللحام=وغير الجمر في يدك موتٍ حمر ماهوب غصنٍ ندي
يازين شكل البُدي مار المكينة ياجماعة عدااام=حاولت اعدل وابدل واختبر مافاد شكل البُدي

شـــلـــهوب

ياهادي المسردي بنت الهوى بعدك تدقّ الوشام=واللي سرق قلبها زيد وعمر مرحوم يالمسردي
اليا ذبحت الهدي عدّيت عن وجه الزمان الملام=وأعدت سيرة علي وابو بكر من يوم طاح الهدي

بندر المرشدي

عليك يالاجودي شطحة قوية فوق فوق الغمام=الله يخليك فكر واعتبر وش فيك يالاجودي
اللي ذبح له فدي ما صد عنه متيهين الجهام= من فوق راسه نزل وبل المطر لو كان ذابح فدي

شـــلـــهوب

لو صاحبي يقتدي مازرفلت سمحه وضاع الخطام=يقول شطحه وعذّر فالخبر ماعاد هو مقتدي
وآ ليلك الأسودي ماينفعك شراب وألا طعام=لكنّ لا عاد تضرى بالسهر ليلك هذاه أسودي