علي فلاح العضياني=

ياللي تبيع البشت و تدوّر بدال البشـت كـوت=عيد النظـر و الاولـه ماهـي بمثـل الثانيـه
أثرك تبا تقعد على هالحال ليـن إنّـك تمـوت=من لا نزل سوق الغلا مهما كسب .... خسرانيه

سلطان الجذع =

البشت ماابيعه وانا من روس راعين البشوت=لكـن ميّـز لاتميّـل شـوكـة الميزانـيـه
ماني بفرتٍ للمكده ... من جديدات الفـروت=دورّ وتلقا اللي تبـا فـي حلـة الجيرانيـه

علي فلاح العضياني=

يصلح عليك البشت لنّك من كبيرين البخوت=و تحطّ لك صيوان وقت مزايـن العتبانيـه
يا صاحبي تغانم الفرصه لا تتركها تفـوت=دنيـاك هـذي منتهاهـا يالعتيبـي فانيـه

سلطان الجذع =

ياعقاب ابن سعدون والله مالعب بك غير نوت=ماهو بعيد تسرحـك بكـره مـع الرعيانيـه
لو أن فيها زود يمديني ثبـت ألهـا ثبـوت=لكنها نقصان فـي نقصـان فـي نقصانيـه

علي فلاح العضياني=

روابعك دايم تشوتـك يالجـذع سلطـان شـوت=راحت حياتك كلهـا مـن إقديـد فـي عسفانيـه
النقص في عقل اللذي بين العرب صوره و صوت=سبحـان ربٍ صـوّره فـي صـورة الانسانيـه

سلطان الجذع =

اما أحكم المعنى ياابن ثعلي ليا قلت البيوت=والا استريح مع العصيمي واترك الميدانيه
مادام هذي كلمتك ياعلي يازين السكـوت=لي شرههٍ وحده واعديها على العضيانيـه

علي فلاح العضياني=

من عادتي ماني بطرّاد السراب مع الخبوت=حنّا ما ندخـل للبيـوت الاّ مـع البيبانيـه
يا ليتني ليتاه رحت ألعب مع اصحابي بلوت=امنوّل أحسبك العور في ديـرة العميانيـه

سلطان الجذع =

انته معزب مير ماعندك شراب ولاش قـوت=على بساط الفقر هـذي عيشـة الفقرانيـه
لو رحت تلعب ياعلي مااشتالك السيل النحوت=هذا اللي انته فيه فالـح ياابـرق الجنحانيـه

علي فلاح العضياني=

حنّا على الطالات يا سلطـان بانيـن البيـوت=ماهيب خيمه يقتلعهـا الريـح يـا سلطانيـه
غرقت في موج البحر و انته ما عندك جيلبوت=و الله لو انّك ( كريّم ) شاعر الجذعانيـه !!!

سلطان الجذع =

بنيت لك ياعلي بيتٍ مثل بيت العنكبـوت=والله على اللي وقعت بين الضلوع الحانيه
هذاك طير من طيور العز ذكره مايمـوت=ماينتقارن في سعد والعود ابـو دخانيـه

علي فلاح العضياني=

الكلمه اللي ما لها خانه تحت ماطـا السبـوت=مفلوج راع الحجّـه اللـي مالهـا برهانيـه
طيرك يابن عساف من جنحانه الريش محتوت=و صقورنا ماهـي بمثـل ملهّـي الرعيانيـه