يالرويس احتزم والقاف توّه شباب = كل كلمه تراني حاسب احسابها
انت يومك تغيّب ليه هذا الغياب = الحبايب ترانا نكره اغيابها

الظروف احكمتنا وانت جاك العذاب =لا تجي للجبال ويقرصك دابها
من يعرف الخطايا من يعرف الصواب = قامت الناس مثلك تشعب اركابها

لاتغيّر كلامك ياعزيز الجناب = العرب من كلامك تفقد اعصابها
ان نويت الخطايا احسب ليوم الحساب = ماتضيع الحقوق وفيه طلابها

السما غايمه والبرق وسط السحاب= والقضيه من اللي يعرف اسبابها
طمعتي فالشداد وطمعتي فالركاب=والرياجيل قامت تفتل اشنابها

انت حطيت للاحزان تسعين باب = والسعاده تحاول تغلق ابوابها
طمعتك دهورتك وصار فيك ارتياب = واليتيمه علامك تسلب اثيابها

السعاده ترا ماهيب فالاْكتتاب= السعاده مع اللي تنقش اخضابها
انت اشوفك تجرا ماتذل وتهاب=والذيابه تحدد قدمك انيابها

وابك انا من رجال ٍ ينطحون الصعاب = وانت تعرف مكانتها ومضرابها
مير حاول تصافيني بحسن الخطاب = ان تزاعلت انا وياك رحنا بها

ابك انا معي مجموعه سوات الذياب =وانت في غابةٍ ينغق لك اغرابها
مايفيد المناغش والحكي والطلاب=فيه حاجه من اللي للبلد جابها

عام الاول يابن جودان شكلك مهاب = صورتك كل ربعك تسلب ألبابها
لكن اخر زمانك صار مخك خراب = والعدا قمت تسمعها وتعنا بها

الاداره لزوم تصير بالاْنتخاب=وانته اطرم وجاهل مير انا اولابها
طيع شوري وسلم واعلن الاْنسحاب=الفتن منك جتنا ليش تسعى بها

انت مشيتك يارجال فيها عياب = صابها من ضروف الوقت ماصابها
انتبه ياقوي العرف والقاف شاب = والليالي عسى الله يخلف اتعابها

والله اني لسوي مشكله وانقلاب=ثم نشوف العرب من يكسب اعجابها
شاب راسك ماهوب القاف يابو الشباب=والجوارح عشاها تحت مخلابها