الهيـــــــــــــلا *** منتدى قبيلة عتيبة - الضغــط والســكر !! خاص للعازمي

سلطان الجـذع

سلام تسليم يجيب الضغط والسكر معه =للصاحب اللي بعد هذا اليوم ماهو صاحبي
آآآخر زمن يالعازمي صوتك عليّه ترفعه =لكن ميرادك على هداج وآآرحب ياصبي

العازمي

يامرحبا ترحيب فيه اعلاج في حزة سعه = ساعة فراقك يالجذع ماهيب غاية مطلبي
لاكان ماطاعك زمانك يالجذع بالله طعه = تعدي على دربي ومن زود التعب رحت اتحبي

سلطان الجـذع

حنا ليا منا ضربنا جنب قاسي نوجعه =وان كان مااسريك هذا الليل في سد شنبي
الا ان عيد العازمي سالم ووقع باصبعه =غير السلامه ياعتيبة وش يريد ووش يبي

العازمي

العازمي لامن مشى فالدرب حاول تتبعه = لا ,, هانت ,, اشنابك عزيزه تحت فيّة منكبي
اخصامي اللي كل ليله من عصاي مسنعه = يارب ساعدني على حلمي قبل جم اغضبي

سلطان الجـذع

ياللي تدور للعشاء كل الضروس مقلعه = واليا قرب منك الخطر يالعازمي سبق الظبي
ياعيد هرجك كل ليله يضحك اللي يسمعه =قال المثل ماتضحك الا فوق نفسك ياغبي

العازمي

ماتاكل العربان والضرسين تحت مرقعه = اليا التفتنا الهم يسبا حالك المنهك سبي
الناس فيها صنف قايد ,,صنف يارجل امّعه = والصنف هذا مايعيش الا تحت برق العبي

سلطان الجـذع

ماعاد فعلومك على ماقال الاول منفعه =يتعب قليل المال لو ماحاصلٍ له مكسبي
اليا انتهى ليل القصيد اضرب حسابك واجمعه =الرمح من جساس ماوفر كليب التغلبي

العازمي

لاصار منت ابند وقتي راح كله مضيعه= العب وانا عارف معك ماهوب مخلوف اتعبي
كان الصقور اللي تجيب الفيد دوم امبرقعه = يحرم عليها ماتحلّق في علو المرقبي

سلطان الجـذع

العازمي جهله بنفسه للعناد يشجعه =لكن يالاوهام حومي فوق راسه وألعبي
بابورنا فالبحر مرسي والهبايب تدفعه = حنا نقول الصدق لاهل الصدق وابليس يهبي

العازمي

فالمعتدين الوسم ياسلطان دايم نطبعه = وانته بعيد ولاهمزت اذنك بسرعه تقربي
بابوركم صفق الهوا خلاه من دون اشرعه = لاتحسبنّه فالبحور الهوج مع نوح النبي

سلطان الجـذع

المشلح اللي كثرت فتوقه نصيحه رقعه =قدام لايضحك عليك المشرقي والمغربي
ان كان ضاقت بي دروبي فالجهات الاربعه =لابارك الله فالحياة اللي تكدر مشربي

العازمي

المشلح اللي كثرت فتوقه نصيبك واطمعه = والي البشوت الفاخره صنع الحسا والا دبي
اشبالنا اللي للمعالي بالطموح امولعه = ماهوب حق انّا نحطمها ولو تدبي دبي