يالله اني طالبك ياكريم وياودود=ياكريمً تبسط الرزق فالوقت الشديد
يالعظيم المعتلي دايم بجودك نجود=دايم بمدات جودك ياربي نستزيد
لااله الا انت سبحانك أخير إمعبود=انت رب الكون كله وحنا لك عبيد
يالعزيز المقتدر مهلكً عاد وثمود=ارفع ايديه وقلبي على قولي شهيد
طالبك يارب من بعد باحٌن السدود=طالبك يامالك الملك في ملكك وحيد
مدةً من يدك وادري ياربي ماتكود= وانت مدك ياجزيل العطا ماهو زهيد
مبتداالوسمي بمزنً به الخيرمعقود= صيّب ٍ يمطروخيره بفضل الله عديد
مدلهمً غاشيً تردعه من شرق نود= ناشيً بمرك ويسقي ديرنا مايحيد
من جنوب المملكه للدبادب والحدود= وغرب من جده يلين الحساء خيره يزيد
غيث ٍ يعم البلد من وعرها والنفود = ترتوي منه البسيطه وكلٍ به سعيد
عقبه اتزين الصحاري من ازهار وورود = ينبت المنبات والنبت ينبت من جديد
كل قفرٍ يكتسيه الحياءفوقه يسود = يظهر النوار والربل والعشب الفريد
كلها لعيون وضح ٍ غلاها في يزود = من غلاها سقت ماعندي إ لها من رصيد
زين شوفتها الى وكد الموعد وكود = وانوو المحدار من نجد والممشى وكيد
عقب يومين ٍ وعدنا على خب العمود = كل راعي ذود مجهز وعزّم بالشديد
مع صلاة الفجر شالوا ووفوا بالوعود = والصبي طوّح بصوته بعد طق اللبيد
من سبق منهم يوقع له الاخر عهود = كلٍ يثبت لذوده بعد ممشاً بعيد
هذي البل عز اهلها من اعصور الجدود = كم تغنوا بالمثايل وقالوا من نشيد
دونها الارقاب تقطع قبل حكم السعود = قبل حكم اللي بناها على الساس الجويد
قاله اللي في طريق العلا يطلع سنود=عقب ماهاضت شجونه وغنّا بالقصيد
القصيد اللي يجمل ويبقى فالوجود = لو تطول اسنين يبقى لمن قاله رصيد