المشاركة الأصلية كتبت بواسطة رعد الروقي (المشاركة 1130224) لعب على اصول يطرب السامع ... اقصد المشاهد العود // معجب صحت السنتكم

علي الثبيتي

الليل يامعجب اقرب دوك عندي سوال=هات الاجابه يابو سلطان في حينها!!
اخر زمان القعود اصبح يقود الجمال=دنيا عجيبه تغث الكبد ياشينها

معجب العتيبي

اقرب واجاوبك يالنشمي على كل حال=ان رحت ليسارها وان رحت ليمينها
ال السعود الحكومه والسدارا خوال= الله يعز البلاد بحكم راعينها

علي الثبيتي

وقتاً مضى مايقدر فيه غير الرجال= واليوم روس العرب تتبع كراعينها!!!!
طاقم قناة الجزيره شغلهم قيل قال؟=حتى الحكومه تلاعب في قوانينها!!

معجب العتيبي

في كل وقتٍ رجاله والكمال الكمال=وفعولنا ياعلي مانتم بناسينا
برامج اهل الجزيره لو يطول الجدال=برامجٍ مثلها منتم بومحينها

علي الثبيتي

يامخبل اللي بنوها فوق جرفاً هيال=عالم ولايتفق ديني على دينها!!
الله يسلط على اهل الكذب والاحتيال= مايبلش اهل العقول الا مجانينها!!

معجب العتيبي

مايعجب العود ياهل العرف شغل العيال=لو كان تتبع عنواينه عناوينها
الله يسلط على اهل المهزله والخبال=والله يسلط على ناسٍ مخاوينها