سعود البرقاوي=

ياسعود وضعك مع الاصحاب ماهو تمام=آظن به حاجـةٍ مانـي بـداري بهـا
اما تجينا علـى التقديـر والاحتـرام=والا العلاقـات سكـرنـا دواليبـهـا

سعود العصيمي=

اليادعتني مواقيفي مع اهل المقـام=والله ماطيّب لحاهم غير من طيبها.
لكن من وين جاين بالخبر والكلام=ياراعي الدره اللي عـاويٍ ذيبهـا

سعود البرقاوي=

اليا نشدناك قلت انك على مايـرام=واثرك كما النار ماتطفي مشاهيبها
لاعاد تنشد وهي بين اللحم والعظام=ياسعود بقعا لاتقرب من مخاليبهـا

سعود العصيمي=

سألتني والاجابه جتك حسب النظـام=واجابتك في سؤالي ليـش تقفيبهـا.
احزامك اللي تحيزم به مع اهل الحزام=من وين شاريه يامكمـل مواجيبهـا.

سعود البرقاوي=

كانك تبا تنتقم حنـا نبـا الانتقـام=اللي تفوتـك دخيلـك لاتهذريبهـا
يابو شنب تعرف إن الطق فك اللحام=واهل الاشانيب نعرفهـا باشانيبهـا

سعود العصيمي=

مادام راحت مراويح القطا والحمـام=افطن ترا اللافيه ماهي مع ادريبهـا.
لكن ابعطيك كلمـه ثالثـه والهمـام=اقرب من النار وأم اجنيب وجنيبها.

سعود البرقاوي=

يا ذا الجمل وين وديت الرسن والخطام=ماباقي الا المسامـة كيـف تسريبهـا
صحبتك صحبة غريبة تختلف كل عام=اثر الاصاحيـب ماتاثـق باصاحيبهـا

سعود العصيمي=

قلت الك يم الجمل سمحان ناب السنام=وعودت ياسعود يم سعود ترميبهـا.
أنا على سلم جدي حرب والا سـلام=والناس ربٍ خالقهـا يعلـم بغيبهـا.

المشاركة الأصلية كتبت بواسطة خيال الصفراء (المشاركة 939488) يا سلام يا سلام دائمااا اراهن على هالشاعرين :) صحت السنتكم .. وكلمة مبدعين قليله في حقكم ...

المشاركة الأصلية كتبت بواسطة العازمي (المشاركة 939665) ابو فهد وطالب الهرش ؟ ابداع وابداع من اهل الابداع صحت السنتكم ياعمالقه