الهيـــــــــــــلا *** منتدى قبيلة عتيبة - محمّد رشيد الزراقي ...... تفضّل

علي فلاح العضياني

يا هلا مرحبا بك يا محمّد رشيد =و الخواطر نظاف و صافيه صافيه
المعاني توضّحها بيوت القصيد= والاشاره تراها بيننا كافيه

محمد بن رشيد

البقا يامرحب شوفتك يوم عيد = ياعساكم بخير ودايم ابعافيه
انت في كل يوم اتجيب علم ٍ جديد = هاتها وافيه ياراعي الوافيه

علي فلاح العضياني

يوم رحنا نصيد و يوم رحنا نفيد=تحسب اني ما اعرف أسرارك الخافيه
في مجال الادب تدري منَ أكبر بليد ؟ = من يغيّر نظام الوزن و القافيه

محمد بن رشيد

رحت تبغا تصيد وجيت من دون صيد = جرّتك قام يسفي فوقها السافيه
في مجال الحياه اللي ماعنده رصيد = العرب تستره بثيابها الضافيه

علي فلاح العضياني

أحسب انك حكيم و معك رايٍ سديد=الزراريق ناس قضاه عرّافيه
و أثرك اللي عن سلوم النشاما تحيد=وش يحدّك تقول الكلمه الهافيه؟

محمد بن رشيد

انت ثعلي وابن عمي وجار وحديد = والدعاوي ثقال احيان واخفافيه
نوب تقرب قريب ونوب تبعد بعيد = وجيتنا بالعلوم اشكال واصنافيه

علي فلاح العضياني

نوّكم يا ذوي زرّاق ما هو سديد=شيّ هذا أوله تاليه ينعافيه
والله إنّا عطيناك الكلام الأكــــــيـــد=دوم ننظر قدم ما ننظر خلافيه

محمد بن رشيد

لاتصادم جبل لو ان راسك حديد = نص الايام برد ونصها دافيه
قمت افكر واميز فالنهار الشديد = كيف تقدح شرار الجمره الطافيه

علي فلاح العضياني

إيه ما فيه مثلك في مجال الهبيد=ثارت البندق و لا صبت الاهدافيه
سيف الاسلام في يد خالد ابن الوليد=يحتمي فالمواقف كل ميقافيه

محمد بن رشيد

حاول انّك بعد قابلت لي تستفيد = كلمتي من لساني كلها شافيه
انت ماتدري اني معك خصم ٍ عنيد = واعرف العلم كله لو بالاوهافيه