رفيع المنزل

سلام يالعتبان تسليم كله خير= واللي يوردها لازم يصدرها
كثرو على الطرقات من يعكسون السير= لكن مدامي جيت والله لادمرها

معجب العتيبي

يامرحبا ترحيب وافي بلا تقصير=واللي يبا الطيبه لازم يدورها
اللي ركب ددسن واللي ركبله عير=احلامهم تفرق ياللي تعبرها

رفيع المنزل

دام البقا لكن باوضاعكم تغيير = اشوف ليه ناس ماني بخابرها
احلامهم عندي ماالقى لها تعبير= كود اني امسك لي بندق واثورها

معجب العتيبي

المجتمع يرقا عقب البعير يطير=يطيح فاشلها ويطير شاطرها
ان كنت متمكن فالعلم والتفسير=احلام خلق الله حاول وفسرها

رفيع المنزل

الدولة العظمى يبغى لها تطوير = يامن من عتيبه يقدر يطورها
اللي يهد طويق واللي يهد النير= وشلون يامعجب هذي نصورها

معجب العتيبي

الدوله العضمى فيها الوفا والخير=والناس يارجال بالزين تذكرها
نور القمر والشمس مايحجبه كم طير=واذا فهمت القول فكرتك غيرها

رفيع المنزل

ذكرى ترى المومن ينفع به التذكير = لاتكبر السوسه وانته تناظرها
وين الحرار اللي بالجو يوم تطير = بالجو مابه طير يقدر يخاشرها

معجب العتيبي

السير لو يدهن لابد يوم يسير=حكمه لماضيها حكمه لحاظرها
الطير اله جوله والطير اله تصخير=ومن غاب عن داره يرجع يعمرها

رفيع المنزل

ماقلت لك قــدّر من لا لهم تقدير = ياراعي الحكمة هلحين بررها
صوت على الغياب وارسل لهم تحذير= قبل ديار الخير تهدم عمايرها

معجب العتيبي

كلمتك مقلوبه ماينفع التبرير=لكن معك فرصه عجل وحررها
والمبعد المقفي مايلحقه تشهير=ولو طالت الغبه تظهر سرايرها

رفيع المنزل

ان كنت يامعجب ناوي بنيه غير = ارخي لك حبالي قدام اقصرها
اصبر يالين يصير شي ٍ ماابيه يصير = مدام من ينصح له ناس يخسرها

معجب العتيبي

ماودنا نمشي بسياسة التقتير=دام المكاسب جات والله مكثرها
ترا الرسايل جات والسر وسط البير=ياصاحبي خلها لا عاد تظهرها