العازمي

يابن زراق جعلك تنوب عن الزراريق = عيال العود وقت اللقا زند وفتيله
مواقفنا سوا فالقدايم تنشف الريق = ولاقط اختلفنا على قسم القبيله

عبدالله حبيٌب الزراقي

ولا يالعازمي فاللقا مافيه تفريق = وكلن دون حاله معه تسعين حيله
مواقفنا سوا ساعة الافراح والضيق = وهذا طبع كل الرياجيل الاصيله

العازمي

جواهر شعر تظهر من اعماق الصناديق = مثل مايبدي القرم في راس الطويله
سمعنا فالقرى علم منك احتاج تصديق = عسى مانتم براضين نكّار الجميله

عبدالله حبيٌب الزراقي

جواهر شعر تظهر مع لحون الطواريق = ومن لا يعرف الدرب مايصلح دليله
تقوله مار انا اقول يالصاحب لاتعليق ! = ومن يسمع علوم العرب مابات ليله

العازمي

احسبنّك جنيه (ن) حمر تطلع تفاريق = تشوف البرق وتقول ماحولي مسيله
اظنّك شاهدٍ للحقيقه دون تحقيق = ترى الساكت عن الحق ماجودٍ بديله

عبدالله حبيٌب الزراقي

اثرك انته تصفق لها ياعيد تصفيق = يباها مثل حرب البسوس الله وكيله
تسويلك دعايه مع العالم وتسويق = سحابة صيف وانته تخيُلها مخيله

العازمي

ليامن الضعن سيق قلت العام ماسيق = وانا اقول الدهر قام يوميلك شليله
علامك خفت وانته من ارجالٍ مواثيق = ومثلك لو يفهق نبا نخلي سبيله

عبدالله حبيٌب الزراقي

يمين الخط يمشون غشمان السواويق = وطول الليل يحسب على العداد ميله
انا ماخفت يالعازمي بلاش تلفيق = آحد ينشر سلاحه وآحد ينشر غسيله