يانشاب انتبه لاتدخل الموضوع ثم تنشب=ترا بعض العرب نفسها مع الايام كلفها
ليامن ضاقيك دربك ترا الرجعه تكون انسب=ومن لايعرف الجره يبا يمش ويعرفها

النشاب

سلام الله عليكم واسمحولي شوي في معجب = لحيث انه رياضي والمعاني من يصرفها
انا لا زلت اقول انه يقول ويفعل ويكتب = يطيرها ليا منه بغى والا يوقفها

معجب العتيبي

مدام انه يسلم ياجماعه ليش مايقرب=ونفسه من طريق اهل الرياضه لايخوفها
على حسب النظام نسوقها والرجل ماتتعب=وناسٍ تبذل المجهود يارجال ننصفها

النشاب

وصلنا معجب وكان انَ ما يحسب لنا يحسب = ومن يبني خيامه في مسيل السيل يجرفها
ترى بعد الخمل عنا من المشرق ليا المغرب = وأشوف ان العتب يركب مراقبها ومشرفها

معجب العتيبي

ترا اللاعب ليامنه دخل في ساحة الملعب=ولا قدّر خصومه دمعة العينين يذرفها
انا ماقول جده تشبه لمكه ولا يثرب=لكنّ المشكله فاللي وصفها قبل يعرفها

النشاب

عشان انخش في صلب الحديث ولجل ما نسهب = وأنا مانيب من ناسٍ تكثر في حسايفها
ترى بعض الكلام الغلث يا رجال ما يطرب = وأنا النشاب مع ناسٍ تشرفني وأشرفها

معجب العتيبي

يانشاب انتبه لاتدخل الموضوع ثم تنشب=ترا بعض العرب نفسه مع الايام كلفها
ليامن ضاقيك دربك ترا الرجعه تكون انسب=ومن لايعرف الجره يبا يمشي ويعرفها