العمر مثل الطيف يمضي بالايام = والناس تفنا ..ما انتهت من غرضها
تمضي ليال وتمضي اشهور واعوام= واللي فـــتل حبل المناوي نقضها
تركــض بنا الايام قـدام قـدام = والموت... حق وكمّ روح ٍ .. نفضها
اتلا حياة العـبد قطعه ..من الخـام = واعمـاله الله قدم عينه ... عرضها
والرابح اللي قسمته... خير الاقسام = وروحه تحت لطف الولي لاقبضها
من فضل ربّه مهتدي.. بامر الاسلام =ونفسه عن ادروب المعاصي وعضها
حفظ جميع اركان دينه... والاحكام = وفروضــه اللي ..ربنا قد فرضـها
والخاسر اللي. مايصلي... ولاصام = وامـــور دينـه.. كلها ما حفظها
ضيّع حياته .. بالتسوّف والاوهام = واليا... دعيتــه للهـدايه .. رفضها
مشغول في طرد المشاكل والاجرام = المشـكله لو جنّـبته .. اعترضها
ياكل وشرب .. عيشته مثل الانعام = نفسه مريضه وهو سبايب مرضها
كم باع في سوق المعاصي وكم سام = روحه بدل نيل المعالي .. خفضها
نصيحتي له يغــنم العمــر قدام = يخسر خساره ما يرجع .. عوضها
خطوى الفتى لاجـاك عزام.. جزام = وصـدره على فعل المراجل نهضها
ترى المراجل.... ماتحقق بالاحلام = المجــتهد يمكن .. يحقـق بعضها