والله ما اروح أدوّر المحماس والبن محموس = العام يوم النار من كفي قديح زنادها!!
الحق ثابت والشهود بغرفة القاضي جلوس = وانا مورد في القضية حجتي واسنادها!!

وش عاب أبو زيد الهلالي يوم حب العيطموس=أهم شي إن الهنوف معربين أجدادها
ماتنتصدق حجتك لو تحلف اليمنى الغموس=منبوذ حتى من شعوب المملكة وبلادها

العيب يوم تروح صيدة ليل للذيب الفروس = والوقت يحسب والليالي ما فصل عدادها!!
العام تمدح في الربيع وترسل اصحابك عسوس = يغريك براق المزون ويخلفك رعادها!!

اللقمة اللي بين تأثير النواجذ والضروس=أقفت سوات الزرعة اللي صامل ٍ حصّادها
يوم الكرامة قلطت وأنته يدينك فالدسوس=ودك بها مير الكرامة عنك قطع إمدادها

يابو سعد ما ودنا نطلق من السجن محبوس = حتى تصحي عين ابو عرام من مرقادها!!
كرامةٍ ماهي بإلي في ذمة الحظ النحوس = وانا بنفسي عز عن بعض الرجال وزادها!!

سيارتك علق مثبتها تدوس أو ماتدوس=أبنصها وبريكها ماضرها مافادها
كرامتك يمكنها حول النصارى والمجوس=مافيه مانع لو تصير أعيادك مع أعيادها