قدرتك ماتنقض لك المفتول , واكفاك العذر = فالساعة اللي مايسر العاجزين قدومها!!
لا والله الا جت لي الدنيا على بطن وظهر = فسر حلومي يامفسر للعباد حلومها!!

الحوت ما تفرق معه يسبح بحر و الّا نهر=بس البلا فالضفدعه من ذا يفك حسومها
ان كان ودك بالعَسَل و السمْن و عذوق التمر=لا عاد تجلس مع هل السفره و تلحس ثومها

اللي يقص الدرب ماندري عمى والا عور = مخطى ولايخطيه مشروه الرجال ولومها!!
من دمك المسفوح اخذنا عينّة للمختبر = والصبح أسلمك النتيجة جاهزة بختومها!!

الله يعين اللي حياته كلبوها في قهر=يشكي عليّ من الثياب اللي قصار اكمومها
ما قد خبرت انّ الجمال العفْر تخضع للبقر= لكنّ هاذي حكمة الدنيا و ذا محكومها

الواجب إنك كل موقف من دروسه تعتبر = جنبك صخيف ولاتعرضه العرب وسهومها!!
ليت تطاوعني ولابعد العسر غير اليسر = وغيرك ثلاث من الطيور اللي قريبٍ حومها!!