معجب العتيبي

مرحبا بالصاحب الغايب ولوهو حاضر=مرحبا ترحيبةٍ من طيبها مثنيه
جيتك ياسعود تشرح خافقي والخاطر=لو غيابك يالنفيعي خرّب النفسيه

سعود البرقاوي

البقا ياللي ترحب واشهد انك شاعر = عقب ماشفتك تجيد الطرق والقافية
جيتي مثل المطر وان غبت ماني قادر = يالعتيبي منشغل فاموري الشخصية

معجب العتيبي

قالوا انك في سياحه قلت والله خابر=مايضيع سعود لين يماشي الطرقيه
وانت معهم يالنفيعي تبتسم وتناظر=في حلال القوم ماتحسب حساب السيه

سعود البرقاوي

يوم جاك العلم واجب تجتهد وتبادر = لين تمشي مثلنا مع كامل الحرية
دام ماضاعت ولاسِرقت دراهم صابر = ماش داعي نزهم الاسعاف والدوريه

معجب العتيبي

والله انّا نعرف الوجهات قبل نغادر=دارسين الوضع زين وحافضين النيه
مانزور الا بلد شعبه بطيبه نادر=واعتقد ياسعود شعب المملكه ما زيّه

سعود البرقاوي

يذكرونك بين منفوحة وحي الحاير = تدرس الاوضاع مدري تدرس الكلية
عسكريٍ ماتسافر وان بغيت تسافر = خابرينك ماتسافر غير للشرقية

معجب العتيبي

والله انك فالمراوغ ياعميلي شاطر=تلتوي ياصاحبي مثل التواي الحيه
في بلادي يالنفيعي ماعليه قاصر=يوم غيري في بلد غيره يذوق الكيه

وانت يامعجب تكابر مير ليش تكابر = مابقى الا تحتزم بالسيف والجنبية
لاتعدى الخط الاحمر فالزمان الغابر = وانتبه تضحك من الجني وابو جنية

انصح المخطي ليا اخطا بالكلام العابر=لا يحسب ان العلوم الثانيه عاديه
ياسعود المدرسه طالب وصف وناضر=وانت لاتخلف نظام الكوره الارضيه

قدموك اهل الجماعة يوم ثوبك شامر = ثم صليت الصلاة اللي بدون تحيه
يالعتيبي من بعد مامات بابه جابر = خربت الطبخة وشغل الدلة البرية

ياعسى بيت الوفا والجود دايم عامر=يوم بعض الناس ياهل المعرفه معميه
اثر صاحبنا كبير السن شيخ معاصر=واحسب انه ياجماعه يلبس الطاقيه