الهيـــــــــــــلا *** منتدى قبيلة عتيبة
صفحة 3 من 4 12 3 4
عرض 40 مشاركات من هذا الموضوع لكل صفحة

الهيـــــــــــــلا *** منتدى قبيلة عتيبة (http://www.otaibah.net/m/index.php)
-   شعر المحاورة (http://www.otaibah.net/m/forumdisplay.php?f=52)
-   -   العمـــــــــــــــــــــــــدهـــ عد الحقيقه ؟ (http://www.otaibah.net/m/showthread.php?t=102357)

رعد الروقي 17-Dec-2009 02:14 AM
سلطان بن ثعلي // الصقيل المجرب ... منورين ومشرفين بهذا الحضور الكريم


ارحبوا ارحبوا



صحت ابدانكم ولا هنتوا

عبدالله الاصعر 17-Dec-2009 02:31 AM
مايشيل الحمول الا متين الجنوب=لا برك حاشي القوم وتثوابها
اثرك اللي عن الدرب العوج مايتوب=القشر في عيونك والعمى صابها

رعد الروقي 17-Dec-2009 02:47 AM
راعي الجنب ماله فالسفينة ركوب=ياكل اكل الكرام ويطــــرق ابوابها
ما سقيناك من كاس العنا غير كوب=بالهنا والشفاء تكبر وتضرابها

سلطان بن ثعلي 17-Dec-2009 03:00 AM



عبدالله الاصعر

ليش يالعمده اللي ماتشوف الدروب=الحقايـق عـلامـك ماتجينابـهـا
انت مانت بعلا بعض العلوم مغصوب=خلّهـا ياطويـل العمـر لاصحابهـا



العمده
لو درست العلوم اللي تفيد الشعوب=كان كل الظواهر تعـرف اسبابهـا
لا تخض البحر وتقول اظنه يروب=اهل مكة تراها تبخـص شعابهـا




عبدالله الاصعر
كيف تتلبس بثوب (ن)ماهوب لك ثوب=ليت مانته مـن اللـي تقلـب ثيابهـا
ضو شمس الحقيقه كيف صار محجوب=النشامـا ورى ماتحسـب حسابـهـا


العمده
ثوب عز وفخر في سلم والا حروب=واحزم الناقصة في ظهـر جلابهـا
انت خلفك جبل لولاه كان الهبـوب=من عصر طيرت لحيتك واشنابهـا


عبدالله الاصعر
مانقول لك في هرجك ياعمده كذوب=مير حجتـك هـاذي قـدّم كتابهـا
الجبل فوقه الارياح من كل صـوب=ولاّ انـا قبـة العـز اتذرابـهـا



العمده
الدلايل مع اللي شب نار الوجـوب=والحرار الشقر في راس مرقابهـا
ما تضر العوارف يا نظيف الجيوب=مار قل للثعالـب نعـرف اذنابهـا



عبدالله الاصعر
راعي البينه بين الرجال محسوب=ماتفيدك عصاك اللـي تعصابهـا
رحت ذنب علينا من كبار الذنوب=مانعرف الوصوف اللي تحلابهـا


العمده
كيف يحسب وغيره فاللوازم ينوب=ما كسبهـا بذرعانـه ولا جابهـا
الكواكب مطلة ما عليهـا عيـوب=والعيـون الكفيفـه دوّر اطبابهـا



عبدالله الاصعر
مايشيل الحمول الا متين الجنـوب=لا برك حاشـي القـوم وتثوابهـا
اثرك اللي عن الدرب العوج مايتوب=القشر في عيونك والعمـى صابهـا

العمده
راعي الجنب ماله فالسفينة ركوب=ياكل اكل الكرام ويطـرق ابوابهـا
ما سقيناك من كاس العنا غير كوب=بالهنا والشفاء تكبـر وتضرابهـا

عزوز النفيعي 17-Dec-2009 03:10 AM
مشكور ياسلطان على التنسيق لاهنت

سلطان بن ثعلي 17-Dec-2009 03:28 AM
العفو يا اخوي الصقيل ماسوينا غير الواجب

شاعر شعبي 17-Dec-2009 03:57 AM
هذي والله الطواريق اللي عليها الكلاام


شاعرين في قمة الابداع


لاهنتوا وصحت الالسن يا مبدعين


تقبلوا الاعجاب والتقدير

عبدالله الاصعر 17-Dec-2009 09:31 AM
سلطان اب ثعلي بيض الله وجهك على التنسيق يالغالي لك من خالص التحيه والتقدير

عبدالله الاصعر 17-Dec-2009 09:32 AM
شاعر شعبي مرورك شرف وصح بدنك تحياتي وتقديري

ماجد السميري 17-Dec-2009 09:35 AM
الاصعر والعمده

فتل ونقض نخبوي

صحت السنتكم وبيض الله وجيهكم


الساعة الآن »07:38 AM.
صفحة 3 من 4 12 3 4
عرض 40 مشاركات من هذا الموضوع لكل صفحة

 Arabization iraq chooses life
Powered by vBulletin® Version 3.8.2
.Copyright ©2000 - 2025, Jelsoft Enterprises Ltd