مرحبا ياسعود والغالي نطب لسوقة=والرصيد اللي معي للغالية يحدانـي
والبعير اللي على الاحمال مالة طوقة=علّم العتبان دونـة تقفـل البيبانـي

البقا بالشاعر اللي لابدى طاروقه=قمت اعيد الذاكرة فبديوي الوقداني
مير وش وسم البعير اللي تشوفه فوقه=يمكن انه من جمال هذيل والسلماني

الشهادة من رجال المعرفـة مرموقـة=والمعرفة كنز وهيه بعد كنـزٍ ثانـي!!
البعير اللي على اللقمة يمـط شدوقـة=من جمال اصحابنا لكن ماهو زوماني!!

انت تستاهل وشاعر مانهضم حقوقه=صاحبٍ مبطي واعدك واحد من اخواني
يالعتيبي لاتشد اعصابك المحروقة=روح كلمني برقم الهاتف المجاني

مصر نكبتها لك الله جات من فاروقة=باعها للانقليز وعمّة النصرانـي!!
مير علم ربعنا برقا وقـل للروقـة=والله انّا مانحب المذهب العلمانـي!!

لاتلد العين في نوٍ تلوح بروقه=وانت ماتحسب من اهل الابل واهل الضاني
العسل حالي ومن هو باللسان يذوقه=يمكن انه كل ليلة يزعج العرباني

ماجنينا التمر من نخلٍ يباس عذوقة=تمرها ياسعود زادٍ لبرق الجنحاني
صاحبك مرزوق يلعبّة ولد مرزوقة=لا تقول انّه شجيع وفارس الميداني

لاتجي للمحكمة بالحجة المطقوقة=عندنا ماتُقبل الحجة بلا برهاني
موتر لاشافه السواق قام يسوقه=في حراج السوق بعته با ارخص الاثماني