رد المرعب على الزغيبي

غازي غـزا الساحـه بعـدة مشاذيـب=وانا محشنـي مـن بعضهـن شظيفـه
ومحش رجـال ٍ يلحقـون المصاويـب=فـي ساعـة ٍ علـى المحـول كليفـه
ولـو كـان سـوى للعذاريـب تنقيـب=واتعب ورى جمـع الـدوادي عسيفـه
مايطـرح الشـاره رصـاص ٍ مكاذيـب=ولا ترفـع الرايـه يميـن ٍ ضعيـفـه
امـا القنـاة وماسـرد مـن مثالـيـب=لانه رخيـص الهـرج عيـده وريفـه
الساحـه اللـي ماخدشهـا عـذاريـب=مـن افضـل قنـوات البـلاد العفيفـه
الهـا بـرامـج مستـمـره بترتـيـب=وتبحث عـن الشـي المفيـد وتضيفـه
وتستقبل اللي يفعـل الطيـب بالطيـب=وتاريخنـا الماضـي تجـدد ارشيـفـه
اما اللقـاء السابـق سـؤلات ومجيـب=وضيق صدور اهـل العقـول الخفيفـه
خلـى الحـروب يشرَفـون المذاريـب=وامست بهـم نجـد العريضـه قصيفـه
شيخانهـم واعيانـهـم واللواعـيـب=تقـول غازيهـم اجـيـوش ٍ كثيـفـه
وسووا لهم عبـر اجهزتهـم مناجيـب=من سيـف ينبـع للسنابـس وسيفـه
وتخيـروا وفـدن يــود ِ المطالـيـب=وفـي منتداهـم يعلـنـون اتعريـفـه
شلقة حروب وكل سبعـه علـى جيـب=وتجمعـوا عنـد العقـيـد ابمضيـفـه
وعقـب السـلام المتبـع والتراحيـب=فعـل لهـم حسـب التقاليـد ضيـفـه
وقالـوا تقدمنـا لملـفـا المراكـيـب=اميـر نجـد اللـي بــوادي حنيـفـه
العـام قلتـوا راع عـنـد الحنـازيـب=ومكانتـه فــي مجتمعـكـم طفيـفـه
واليوم حطيتـوه شِيـب ٍ ولـد شيـب=وفي مشيختكـم صـار عنـده وظيفـه
وقلتوا ترى له ماكـر ٍ فـي الشناخيـب=وجده وابـوه اشـراف وامـه شريفـه
مـره تحطـونـه يـقـود الجنـاديـب=ومـره يـقـدم للصويـتـي عليـفـه
وقوم النفاعي لا عـوا الذيـب للذيـب=دقلاتهـم جـمـع المـعـادي تخيـفـه
ورادة الحـوض الذحاحـي اليـا هيـب=ومفرقـة شمـل الولـيـف ووليـفـه
تفرح بهم في الضيق حـرش العراقيـب=اليـا تواجهـة السـرب فـي الحتيفـه
وببيوتهـم للضيـف قـدر ومواجيـب=اليـا ركبـت غبـر السنيـن المحيفـه
يضيفـون اضيوفهـم شمـخ النـيـب=ليامـن ولـد الـلاش شـح برغيـفـه
وبعض الضيوف ان صار شمات ورغيب=يكفيـه مـن تالـي الكرامـه غريفـه
وان كان تذكر طالع القطـش وعضيـب=وسبيـل وعزيّـز وهـايـس كنيـفـه
وبدر الحويفي وابـو مـرداح وشعيـب=واللـي بعـث لـه للحويفـي صحيفـه
وسعـود ومساعـد وعـردان وهديـب=وابـن دفيلـج فـازع ٍ مـع حليـفـه
ونايف وبادي وابـن خشمـان وكليـب=وحبـيـب ورغـيـان راع القطيـفـه
والحثـل واللـي لحيتـه كلهـا شيـب=وتركـي وابـن نفجـان راع اللفيفـه
لـو فيـه لجنـه تعتنـي بالهنـاديـب=وتعطـي الجوايـز للرجـال الحصيفـه
ليا قيمـوا ضـرب الرمـاة المعاطيـب=ميـة رصـاصـه ماتـعـادل قذيـفـه
وانته سلاحك مـن دقـاق المشاعيـب=ولامنـك ياراعـي المشاعيـب خيفـه
مالـك صـلاح ابمظلمـات السراديـب=نـك ظلوعـك ياالزغيبـي انحيـفـه

مبطي ماشقرت على ديوان ابوصالح عسى الله يطول عمره