اعطيك سمن وعسل وتقول ابا منك زود = على كذا وين من يشبعك من منزله!!
ماهوب مشتالها لوكان نوه يقود = من دونها حد سيف ٍ من يجي يأكله!!

انته كلامك يا ابو طايل يداو الكبود = مير البلا اللي تقوله ليه ما تفعله
العام الك زند يقدح من خيار الزنود = واخذته ام الكباير وامرها تقبله

مانته على ماتقول من الكلام محدود = وليا لزمنا الامر ماتعمله نعمله!!!
ماهمني غير يوم انك تمد الهنود = واللي قريّب من اهل البيت ماتسأله!!!

هذا كلام الحقيقه والاوادم شهود = يا لابس المشلح انته تعرف مفصله
ايامك عمرك تغيّر بين بيض ٍ وسود =يا باذر ٍ في مزارع جارك السنبله

اطيب شهودك نهار العلم هذا شرود = يمكن مايشهد معك لو هو يبا المرجله!!
هيا اغتنم فرصة ايام السعد والسعود = العمر محدود وايام السعد مقبله!!

قال المثل خف من الخبل المعافا الهبود = لكن مصير الشنب للموس لا تفتله
ما اطري على بالك الا اعتزوا بالجدود = الموقف الحامي يردك وتعرف هله

حنا رجال ٍ علمنا فوق راس العمود = تبا تقوم القيامه محد ٍ نزله!!!
الموز يكفي عيال الضلع لاجت ورود = والسيف من زل دربه حقه ويقبله؟؟