ياهلا بك ياعلي عز الخـوي يالصبـري=ماجهلت بْ طيب نفسك والله اللي خابـر
بس كلمه واستمعها واسبره من سبـري=وانت مثلك والله انـه للمعانـي سابـر
الشعر ساعة كتبتـه ماخذلنـي شبـري=لا ولاحتى كسرني فـي بحـوره شابـر
ماخذيته من خيـال المنطـوي المبـري=اكتبه حاضر بحاضر مااسهـره واثابـر
يرحم الله ياعلي منهو فتح بـه قبـري=بعد موته فـي محـط العابـره والعابـر
ذاك لوخالط غرامه من عرفتـه حبـري=ماحرمني نوم عيني يوم انـا لـه قابـر
لاحرام اني دفنته قبل يَرْخِـص تَبْـرِي=في وسط سوق الرويبض لوعليه يْكابـر
ياعساه اكبر غنيمه في عيون العبـري=مابقى له شيء واحـد يستحـق اكابـر
علها بعض الطـواري علهـا ماتبـري=من على سبع الجوارح والزمان الغابـر
لاجل تِشْرَبْه المحاني لانفذ بي صبـري=واحلف الخاين يموت ولايموت الصابـر
من خذا حبل الوتين ومن سكن به جبري=لو يجي حد الكرامه لااقطعه من الدابـر
كيف اجل باللي خذا دور التقي واللبري=حولّوا به مافرق بيـن النِّبـر والنابـر
لوعرف سر الحَبِير امداه عِرف الحبري=ضايع ٍ حبَّار ماها مـع طـروق الحابـر
ياعيون المقبله نامي قريـره / وابـري=ياجروحه جعل ماله فـي زمانـه ثابـر
ياعلي جتْك المعاني واسبره من سبـري=دام مثلـك والله انـه للمعانـي سابـر

ياكبرهـا لاطـاح مِنْـك احتمـالـك=يطيح من بعده من عزومـك الحيـل
وياشينهـا لاصـار حتـى خيالـك=لاارتحت ساعه راح يسحب لك الويل
تطرد سـراب ٍ راح عنـك ولا لـك=غير التوجِّـد والسهـر والمواويـل
ياكم سهرته من لظى الضيق هالـك=وياكم بكاه الجدي وابكيت انا سهيـل
ارثيه حسـره لـو بقـول امتمالـك=وانعيه في وجـه الليالـي تراتيـل
ضاقت بعد ماغـاب كـل المسالـك=اسال عليه الليـل واجـاوب الليـل
ياليل!! لاغـاب القمـر مالفالـك!!=هو فيه احد غيره يسامِـرْك قنديـل
عليـه دمـام الحنـايـا امتهـالـك=لاتنشد اهل النيل وش يعنـي النيـل
الشوق مايعـرف حبيـس ٍ ومالـك=راحوا من اسبابه زحول الرجاجيـل
ياطول خيـط الليـل ليمـن طرالـك=فرقا تسوق الروح للضيـق تنكيـل
عليك ياللـي مـن عنـاه اشتكالـك=قلب ٍ يسريني على اربع محاصيـل
الطيب والنيَّـه وظـرف ارتحالـك=والرابعه جمره بْ صـدر المقابيـل
الله يبيـح الشـوق لاجـا مجالـك=والله يبيحـك ياعساهـا تساهـيـل
دام البقالـك والـوفـا والغـلالـك=ماهمني يوم ازفر الضيـق وآكيـل
ايوالله افـدى بسمتـك مـع دلالـك=وافدى دلع روحك ودمع المضاليـل
كلمه طرت لي يـوم قلبـي حكالـك=زيدي عذاب القلب (بلحيل بلحيـل)

(ياصاحب الحس النقي) الله ولا سَمَّ الملام=أقرب وخذ ماطاح به صدري وردَّه لِجْمِلَـه
ياضيق صدر البارحه أواه من صمت الكلام=وانا معك ماغيـر دثـر خافقـي وْ زمِّلـه
لحظه عساني مااعدمك لاهنت قبل إنك تنام=دام الغلا لك والبقا لـك والتوجـد والولـه
ماني ببياع الهوا لاهـل الهـوا لابالحـرام=قلب ٍ نزلت بداخلـه مـاوالله أحـد بْينزلـه
لكن بمان الله وخذها واضحه مسك وختـام=حرف ٍ نشا في داخلي مرالخفـوق وحَمَّلـه
سلام ياطهر الحروف البيض والنيه سـلام=والا الهروج الناقصه عن كل حرف مجمَّلـه
ماجيت ادور من ورا عذري ابي منك اهتمام=أخطيت ؟ لاوالله فلاني مخطي بْ ربع أنمله
حبيت ؟ ادري كنت اشوفك بس من بد الانام=كرهت ؟ لاوالله ولا ظني لك بْ يوم أحملـه
تدري وش اللي ردني عنك؟ لانك قبل عـام=تاخذ ولاتعطي عسى لاحـن قلبـك تسألـه
كم ليلة ٍ جيتك وانا مابين شوقي والهيـام؟=كم ليلة ٍ تعبيرك الصادق عجـزت اتأملـه؟
يمكن لأنك ماعرفت تحب واخلفـت النظـام=حتى اختلف بي كل حس وكل نبض مْهملـه
الله معـك لاتلتفـت والنيـه النيـه ظـلام=ماطحت قبلـك لا ولابعـدك ودربـك كملـه
(ياصاحب الحس النقي)الله ولادرب الغرام=طالت تناهيد الشعـور اللـي تعبـت آأمِّلـه

نفتـح البـاب والا نغلقـه يالرتيـق=لاجديـد ونضيفـه او قديـم ويـقـال
شي واحد واظنـك تعرفـه يالعريـق=مكمنه وسط روحي ياعسـاه الـزوال
نوب يلفي بشوق ونوب يلفي بضيـق=يوم جمر المفارق له بروحي اشتعـال
ليت حلم ٍ غفى ياليت لو هـو يفيـق=كم لعب بالحنايـا كـم تربَّـع وجـال
طفلة وكن ربي خالقـه مـن رحيـق=جل منهو خلقهـا بيـن حسـن ودلال
كنهـا يـوم قالـت يالغـلا لاتضيـق=تلت القلب مني غصب بنـت الحـلال
راحت ايام عمري في يديهـا حريـق=ليتها يوم غابت غـاب معهـا سـؤال
ويش ذنب الخفوق اللي غدت له شقيق=ويش ذنب الرجل لاحب بنت الرجـال
حالف ٍ في غلاها حالف ٍ لَ استريـق=اعـذب الشعـر واصبـه لعينـه زلال
مانصـوغ المعانـي لالفظنـاه زيـق=يايجي نقد صافي . او ذبحت الخيـال
باطن الصوغ نار وظاهره لـه بريـق=مثل صوغ الذهب مابين حال ٍ وحـال
نار تلفظ زفير ونـار تلفـظ شهيـق=لين عقد الذهب يزهى بعيـن الجمـال
لوتشوف الصخر يحمل معالـم طويـق=اعرف انه يشيل اللي عهـد مايشـال
اترك الحرف خله في دموعه غريـق=لو يهمهم غيـاب ولويتمتـم وصـال
عل ضيق المحاني لو يـروِّح طليـق=نطرق القاف بسمه في جحيـم الليـال

سلَّم الله قلـب مـن صبَّـح وسلَّـم=يامسلَّـم جعـل كـفـك للسـلامـه
شاعـر وْ وقـت المنـازل ماتثـلَّـم=كفك اللي تشرب المـوت بْ حسامـه
لك وسام الحرف وابداعه / يَ إنْ لَمْ=يصدق الهاجـس وظنـي واحتدامـه
هو صحيـح العلـم قلِّـي او تحلَّـم=لاتجاوب !! واعتبـر ردي غرامـه
وآلـم ولـو مازهمتـوا لـي تولَّـم=جيـت ادرجهـا وللمعنـى ارتسامـه
مانزلـت بْ طور حـار وِمْتِبَـلَّـم=كل صـوت ولـه معاويـل وعلامـه
مـن بنـات الفكـر لاقـام إ/يْتكلَّـم=يسرق المنطوق من بطـن الغمامـه
لاجل اقـول ان المعانـي لـو تألـم=ماشكت من ضيق!! تدري وش مرامه
خبـروا مضنـون عينـي يامسلَّـم=بان من شوقي على القلب انقسامـه

أنت ياللي ماخذ ٍ دون البشـر تفكيـري=قل لطيفك يافديـت دموعـك المنهلَّـه
لايجي صوب الضلوع الباليه ياطيـري=مايكفي مر قلبـي مـن شهـور وتلـه
آتجلد لين ماطاح الرشـا فـي بيـري=وين قولك لاحرمـت بْجيِّتـك هالطلَّـه؟
ول ياقلب ٍ حفظتـه ماحفـظ تقديـري=كيف طاعك ؟ ليه عيني ماغفت معتلَّه!!
يعني البارح لفيت ومختلـف تعبيـري=وش حداني ليه جيتك ويش انا ساع ٍله؟
غير قلب ٍ محترق ليته رضا تخييـري=لاجل أقول أن السكوت بْذِمتي أحسن له
ضايق ٍ صدري عليك وتشتكي تقصيري=أسالك بالله قلِّي وش تبي توصـل لـه؟
كان قصدك به دلع هذا الخفوق وصيري=سيدة عرشه وحقك تآمري فـي حِلَّـه
بس اذا قصدك تغلي في حسب تصويري=كل باب ٍ لك فتحته في يدي بـاب ٍ لـه
باح سدي يوم قلَّت حيلتـي وتدبيـري=وش بقا ماغير أنااطلب خالقـي ياعلَّـه
ياتجيني ليـن ينبـت بالوفـا نوِّيـري=أوعساه يزيل ذكرك مـن حياتـي كلـه
لو رضيت بكل كف ٍ ودها تصقيري=كان سوام الضحى مبطي وانا طير ٍ له

مطـار هيثـرو . جـاك طـيـراً مهـاجـر=مــن نـجـد لــو دقـقـت نقـشـة جنـاحـه
خـجـول بالفـطـره . رقـيـق المحـاجـر=حرصٍ علي الاخلاق بارض السياحه
ماانغـر واصـبـح فــي جمـالـه يتـاجـر=كان الحـلا نعمـه . تـرا العقـل راحـه
يشـيـل لــه لـيـلٍ مــن الـغـرب داجـــر=يضـوي عـلـي شـرقـاً تـجـلا صبـاحـه
تنطـق عيونـه وقـت صمـت الحنـاجـر=والكحـل برموشـه . دليـل الصـراحـه
حـلـمـت بالشـبـكـه وطـقــم الـبـنـاجـر=وصحـانـي الـفـارس بـزرقـه رمـاحـه
اجـري ورى الاوهـام والوقـت فـاجـر=ذقـت الضمـاء قبـل الغـديـر وقـراحـه
وعــوّدت فــي قلـبـي ثـلاثــه خـنـاجـر=ولـو صـابـه الـرابـع يـزيـده سمـاحـه
مفـتـون مـالـه عــن منـاجـاك زاجــر=لا تـعـب فـيـك اكـثـر تـحـقـق نـجـاحـه
لـو اقطعـه قـطـع الخـشـب فالمنـاجـر=وارميـه مـن صـدري نبـت فالبـراحـه
دونــه بـحـر ياقـلـب . تبغـيـه هـاجــر=حوّل عن المركـب . واخذهـا سباحـه

الـلَّـه عـلـى نــو ٍ مِــن الغـيـم سـاجـر=سحابـة ٍ فـي وســطْ روحــي مِطـاحـه
مــرَّتْ وقَــرَّت بالضـلُـوع المـشـاجـر=ياكِـنـهـا طــــبَّ الــهــوا وانـشـراحــه
أرويـت بـه قلـب ٍ مـن الضيـق بـاجـر=أقــرأ وابسـمـل وازفــر الـهـم راحــه
زفـرة وهـم لـو صـدر الايــام ضـاجـر=لو نرسم البسمـه هـوت مِـنْ جراحـه
عاميـن أَمِـسَّ الوصـل ويـعـود داجــر=عـجـزت أَمـيِّـز حرمـتـه مــن بـواحه
واقلبـي اللـي مـن طنـا البـعـد عـاجـر=أَربــع ليـالـي / نـافـر ٍ مــن مْـراحــه
طفـلـه تـمـر الــروح مــرَّ الـشـواجـر=تلـعـب طــرب وانـــا آتِـلـقـى رمـاحــه
أعطيتها / كف / وضمير / ومحاجـر=واعـطــت لـطــرَّاد الـفـرِايِـد صـبـاحـه
لـو جيـت لـه ناصـح فـلا جيـت حاجـر=راحـت !! ولكـن سهَّـل الـلَّـه رُواحــه
روحـة وفـا / ماهـي بْروحـة مْهَاجـر=لعيـون مـن مـرَّ الحـشَـى واستبـاحـه
وآدعـتـهـا مــيــر إنَّــهــا يالـمـسـاجـر=تـلـت معاليـقـي مـعـه مـــن صـيـاحـه

مشتاق!! لا قولي عهد ميِّـتٍ شـوق=مخنوق!! أَدري وش ورا الهَّم ؟ضيقه
هذا وانا لي عنك يومين!! محـروق=أمسي بهمِّك واصطبح فـي شقيقـه
فكِّي لِي الضِّيقه أَبا أسمعـك وآروق=دام الزَّهـر ماحـرَّم اللَّـه رحيـقـه
والْكِلمة اللِّي وقفـت دونهـا حلـوق=بآقولهـا بس إمهلينـي دقيـقـه
مِن َشان لامرَّت مسامع هـل البُـوق=اللي جهـل يعـرف يميِّـز طريقـه
مانيب لاطرقـي ولاجيـت مطفـوق=ولاارقبت آخايل بالسَّحـاب وعليقـه
جيتك سما قلبٍ من الفقـد /مفتـوق=وجيتي دوا لجروحي المستفيقـه !!!
يعني على ماقيل شرهـات وحقـوق=ظامي وصالك جـرَّح الوجـد ريقـه
قولي أَحِبَّك بارتـوي منـك منطـوق=أَقِدِّ لِِك صدرك عشـان استريقـه ؟
تدرين !! خلِّيها مع الصِّبح بِرفـوق=لاطاحت غصون العشيق إل/عشيقـه
وإلا تعالي بـودع الصـدر مشلـوق=وردي علـي قلبـي وهاتـي بريقـه
بعده بمـان الله وان عـاد مسـروق=امَّا نزيـد الوصـل / وإلا نعيقـه !!

ياالربع يوم الهواوي جتنـي ابياتـه=فتحـت قلبـي لهـن حتـى يخشنـي
عساه يلقـي رفيقـه عنـد هقواتـه=وان ظن فيه الوفاء ماخاب لـه ظنـي
راعـي ضريـه بعيـدات مسافـاتـه=لكن نفحـات جـود الشيـخ مرنـي
مع كل ربعـه ركـز للطيـب راياتـه=مكرم ضيوفه حليـف الهيـل والبنـي
وجهه عليه الرضى في كـل حزاتـه=يضحك ويرشد ويكتب شعـر ويغنـي
يا طالبين المراجـل سـووا اسواتـه=اللي عن الواجبه مـا هـوب متونـي

الله على اللي تشـوق القلـب فزاتـه=منوة غريبٍ طـرت لـه داره وحنـي
عامين بالسجن ليل الناس مـا باتـه=يقضي جزاء ما اقترف بالقيد متثنـي
واجهـد بحفـظ الكتـاب وردد آياتـه=وعليه اعانه عظيم الفضـل والمنـي
وحفظ وطاحت عنه باقـي عقوباتـه=واخلوا سبيله وهو من قبـل ماظنـي
عدا يبا النقـل لكـن باصهـم فاتـه=وبيض الليموزين من قدمـه يمرنـي
والاجر غالي وهو عدمـت امكاناتـه=ولا عاد ينظر بهن راحن ولـو جنـي
خمسـة وعشريـن باقيـةٍ بمخباتـه=ولايعرفـه بالبلـد هنـة ولا هـنـي
وفطن له اللي ذرا المضهود فزعاتـه=شروى شيـوخٍ جمايلهـم يشوقنـي
ويانجم قافٍ شعت هجسـي عباراتـه=(يضحك ويرشد ويكتب شعر ويغنـي)
يضحك لشوف الرفاقة من حسن ذاته=ولو كشّرت شفتـي لأوطيتهـا سنـي
ويرشد يبي رحمة المولى ومرضاتـه=وله قدوةٍ في نذيـر الأنـس والجنـي
ويكتب شعر لو طـرا للقلـب مافاتـه=ويهيضنـه قوافـي زيـد ويغـنـي
يا نجم هجسي خذلني فـي مجاراتـه=ان كان هجسك يطيعك جاوبـه عنـي

حي الله اللي يسـوق العلـم باثباتـه=لوكان ماهو مـع الطـاروق متعنـي
عريب جد وعلـى الجـزلات هَدَّاتـه=هذاك لنَّه / ولـو ماقلـت أنـا لنَّـي
من فوق صلب الصخر جا ينحت إبياته=ياكـم وياكـم وياكـم فوقهـن دنـي
كن البحـر منهلـه والغيـم يقتاتـه=ماهو على قولت الـرَّوَّاي ليـت إنـي
أما أنت يامسنـدي فالـروح موَّاتـه=دونك ودون الخـوي والديـن لكنـي
من يوم طاحت عيوني قل على ايَّاته؟=طاحت على قولتك (لاوطيتها سنـي)
أخلفت علمي معـه واخلفـت مَدَّاتـه=كف ٍ يالـو قصـرت قصيتهـا منـي
لكـن يالقـرم رد العلـم أو هـاتـه=لوجيت أحث القلم ماجيت أبـا اثنـي
إلا اني اطرد هـوا بالـي ومشهاتـه=وآسج معك القدم مـن ويـن ودنـي
شيخ ٍ تضيع المكـارم فـي مداراتـه=مدَّات كفك علـى النمـرود والسنـي

بطلق اسـر القلـب والحقـه العنـان=وِان لقيـت القلـب قلـه ويـن كنـت
مابقـي للـحـزن فــي قلـبـي مـكـان=شايـل ٍ هـمَّ الفـراق وهـمـك إنــت
إن كتمت الحزنَ سبَّـب لـي جنـان=وان شكيت الحزن قالوا لجل بنـت
إنتظرك إمن السَّفر لي فيـك شـان=وبعد جيتوا زانـت علومـك وزنـت
تــل شـعـرة شـاربـي تـلَّـة هــوان=كـان لـديـت العـيـون وكــان لـنـت
قلبِـي اللِّـي كـان مطـرق خـيـزران=مـن حجـر ببنيـه والا مـن سمنـت
الضمـاء عنـدِي ولانـهـر الحـنـان=كان لرويت العطش من مـاه خنـت
وانـت أبـد مثـلَ الامانـه فالـزَّمـان=يـاوديـع العاطـفـه مـايــوم هـنــت
وش لقـيـت بعالـمـي غـيـرالامـان=يالوحيـد اللِّـي علـي الخفَّـاق منـت

الجزال / النِّدَّرْ / البيض / السِّمان=مرحـبـا بــه كــل مابـانـن وبـنــت
مايـوفـي حقـهـن صـــح الـلـسـان=يعلـم الله يانـدي الكـف / كـنـت !!
ماعـرف وش كنـت لكـنَّـك مــدان=جبـت عذبـات النُّـوادر وامتحـنـت
خـافـق لــه قطـعـة أَيَّـــام وثـمــان=بين زفرات الوهن والضيق عنـت
أَشهد إنَّـه ماعلـى روحـي ضمـان=إِن كتمـت الحـزن بـعـده أَوعلـنـت
إن ضحك لي ضحكت الدِّنيا عـلان=وان حــزن يالعنبـوحـيَّـه حـزنــت
كـن قلـبـي فــي يديـنـه صولـجـان=وفي غيابه غير همِّي وش ضمنت
ليت لـو خـان العهـد / اقـول خـان=لَاجـل أَقـول إنِّـي لحبَّـه قـد دفـنـت
البـلا والمـوت مِـن سحـر البـيـان=ساكن ٍ قلبي وانا أدري به سكنـت