الجذع يعرف مقامه والغنايم في يدينه =يوم عود الحنظله ماله عروق ولا نوامي
الله الله يابن ثعلي بالهدوء وبالسكينه =اشهد انه ماخدع بعض العقول الا الحلامي

علي فلاح العضياني

علّموا سلطان بن عبدالله ... الله لا يهينه=إيتقدّم للقضا ولاّ يوكّل له محامي
وإن حضر فالمحكمه يا زينها بيني و بينه=الدلايل عندنا توجب معاقبة الحرامي

سلطان الجـذع

من يناديني وأجي له ياعسى ربي يعينه =غير علّي ليا سمعت علومه أهديه السلامي
الدليل اللي معك صاحبك لايمكن يدينه =كل ماجينا نخبط الغصن ويطير الحمامي

علي فلاح العضياني

الجذع طيّب و لا يرفع معي حجّان عينه=و إليا جيته قام و أعطاني تحيّه وإحترامي
السفينه حكمها بيدين ربّان السفينه=وانت لا تخطي على الركاب و تغرّ النظامي

سلطان الجـذع

البعير شعيل مانعرف هديرة من حنينه=عاقلينه بالعقال وخاطمينه بالخطامي
ماات ربان السفينه ياعلي موت الدفينه =الله اكبر ويش نرجي فالقبور ام العظامي

علي فلاح العضياني

فيك عاده يا وسيع المعرفه ماهي بزينه=كيف تستغفل عقول الناس و تعيد الكلامي
إنشد السلمان والسبعان و مطير و جهينه=من هو أقوى فالعرب شاعر ؟ ... يقولون الزلامي

سلطان الجـذع

الكلام اصله معاد من العوارف سامعينه =وانت ماانت مشككٍ فذخيرتي والا حزامي
بارك الله فالزلامي طوّل الله في سنينه =مار لاتنسى العصيمي فالمواقف والزحاامي

علي فلاح العضياني

خلها حاضر بحاضر بيننا مافيه دينه=أثرك اللي ما يفرّق فالحلال و فالحرامي
يا ولد عمّي تشهّد ساع موتك حان حينه=بكره يقولون عانه مات جعله للرحامي

سلطان الجـذع

أنصحوا لي علي جعل الله يرحم والدينه =لااتحمل لي على هجده من عتيبه ملامي
البنادم فالقدر ياصاحبي روحه رهينه =ولن قمرنا غاااب قلي كيف تسري فالظلامي

علي فلاح العضياني

النصيحه للذي ما يمنعه سلمه و دينه=عن حلال المسلم اللي يسرقه في كل عامي
قبلة الاسلام في مكّه و لا هي فالمدينه=تتّجه وقت الصلاه الناس للبيت الحرامي

سلطان الجـذع

لاترجعها رخيصه بعد ماجاتك ثمينه =انت عادة فيك جلب الباعه اللي ماتسامي
انت وينك والكلام اللي تسولف فيه وينه =ياعلي فلاح صح النوم ..طولت المنامي

علي فلاح العضياني

الجذع سيارته لو ما دهن سير المكينه=إنقطع سير المكينه وإقعدت به فالمضامي
الكلام اللي نقوله قدم عينك مثبتينه=كل ليل أكويك زين بميسمٍ فالنار حامي

سلطان الجـذع

الجذع يعرف مقامه والغنايم في يدينه =يوم عود الحنظله ماله عروق ولا نوامي
الله الله يابن ثعلي بالهدوء وبالسكينه =اشهد انه ماخدع بعض العقول الا الحلامي