الهيـــــــــــــلا *** منتدى قبيلة عتيبة - ياسعود العصيمي على الميدان !!

غازي الدعجاني=
ياسعود لاجيتك تحيزم طال عمرك بالحزام=والعلم واضح يالعصيمي مايبي له ترجمـه
يالشاعر اللي كلمته لاهي حلال ولا حـرام=مسلم .. وطبعك مايشابه غير طبع مسيلمه

سعود العصيمي=
انا على طول امتحيزم في وغى والا سلام=ومن الرصاص المنطعج دايم نظيف محزمي
الليله انته ياولـد غالـب مغيـر فالنظـام=واللي طرا لك ماخفاني في كتاب الانظمـه

غازي الدعجاني=
كم قلت لك ياسعود خلك من طجي اليا سنـام=إسمع كلامي زين ياسعود العصيمي وافهمـه
عيد الفطر معروف وقته من بعد شهر الصيام=وإبليس في عيد الضحيـه كلبونـا نرجمـه

سعود العصيمي=
كم قلت لك يالطالب المهمل تذاكر لاتلام=لكن ما يفهم ولا يطعـم كـلام معلمـه
يالله عسى الفضيه تسيلها هماليل الغمام=واتربع الديره وهلها عن طعامٍ تطعمـه

غازي الدعجاني=
انته معلم يالعصيمي مامشمى حسب النظام=الجمع لازم يطرحه والضرب دايم يقسمه
ياكبر قلبك مانفع فيـه التفاهـم والكـلام=ياللي تهز الراس حرّك مابه الا جمجمـه

سعود العصيمي=
في ذمتي ماني براعي علم يجلب مايسـام=حبر القلم مايستوي خطه وخـط المرسمـه
الليل عان الحمل في ظهر الجمل ناب السنام=انكان تقدر تخطمه امسك اخطامه واخطمـه

غازي الدعجاني=
في ذمتي ماسامها عندك ياكود احمد غلام=يزهمك بأسمك داخل الميدان وانته تزهمه
الحمل زوزابه سعود العام والديره عسام=إنشد قضاة المحكمه تعطيك هرجه مفحمه

سعود العصيمي=
انته لاتنسى ماذكرنا قبل عام ونـص عـام=ترا الخبر من مصدره يوم الذهب من منجمه
الحمل زوزابه جمل والنافره عيـت تـرام=وانت علامك ماتشوف الذيب فاتح لك فمـه

غازي الدعجاني=
هذي حقيقه ثابته عنـد الرياجيـل الكـرام=واللي تشوفه في طريقك يالعصيمي علمـه
الذيب هذا ياقشر حظـه ليـا حـل الظـلام=يعوي على الرجم الطويل ومن يشوفه يلزمه

سعود العصيمي=
اهل الاشده ياصحيبي ما تحال اهل المسام=قال المثل من لايغبـر شاربـه مادسمـه
خلك قوي البأس ياغازي وتفتك الجهـام=حنا ترا من نلزمه فالمعركـه مانرحمـه

غازي الدعجاني=
انته تقوله من جهل ولا دخـل عينـك منـام=مافيه تمره تنوكل من دون ياسعـود عجمـه
السم من ناب الحنش قد راح في جوف العظام=رح واطلب الله طال عمرك والصبر خله سمه

سعود العصيمي=
اللي كلا التمر ابنواه اكيد برقه برق شام =ماهو بمثل اللي يحل المبرمه والمبهمه
انته كفو ياصاحبي غازي ولاالحقك الملام=لكن بعض الناس متساوي وجوده وعدمه