ياعلي بنت تال الوقت مافيك حيله = واول الوقت ياولد الثبيتي مغيّب
صدق من قال مافي هالزمن مستحيله =وأطيب الناس يحسب كل رجال طيّب

الخطا من عقيد القوم عيب وفشيله=والحراكات عيب من الرفيق القريب!!
هات مده جزيله واخذ مده جزيله=امش منهاج ابو تركي ومنهج حبيب!!

انت بعض الدعاوي تتخذها وسيله = لن صاحبك ماقال الكلام المعيّب
اخذ مني نصيحه والتزم بالفضيله = الفضيله نجاتك بالنهار المهيّب

انت ودك تشب النار خشم الفتيله= مار راجع حسااااابك قبل راسك يشيب!!!
النصيحه تجي بين العميل وعميله= سر ياحلوها مثل العسل والحليب!!!

ماسعانا لشب النار بين القبيله = مار بعض العرب شفنا بها الظن خيّب
ضاع بعض العباد وضيّع الله دليله = يحفر الساس خاوي راس مقطوع صيّب

عندي اخباركم ياهل السراة وبجيله=ماجهلنا العرب فيهم صدوق وكذيب!!!
صافي الجم ماتغطا عليه النثيله=وانت لغزك يابوحمدان ماهو صعيب!!!

عندك اخبارنا والبرق واصلك سيله = اعرف انك خطير ولو تسوي حبيّب
مابقى غار احطك فوق حام المليله = لين تعرف حلال الناس ماهو مسيّب

يازمان العجايب فيك صفقه وميله=من سبايبك ضايق كل صدرن رحيب!!
الاسد والنمر صارت تخاف الحسيله= والحصاني بتال الوقت قامت تذيب!!