كان تبغاها حرابها جايتك فرّه وكرّه=والمعارك فالشعر نعطي لطاريها بشاير!!
في ديار جدودنا والضلع مايترك مقرّه=غير ضلعً عندكم ياهل عشيره والحفاير

عبدالله الاصعر

مرحبا بالكبتن اللي فالسنه يبين مره=له شهر عرض السنه ويغيب لين الحول داير
ياثبيت الله حشركم بين ضلع وبين حره=في مسيل السيل ياهل السيل تبنون العماير

كبتن عتيبه

البقاء واللّي ذكر ربعه كذا لِلَّه درّه=ولو اغيب اعن النشاما حُبُّهم جوف الضماير!!
أنت من خوفك مسيل السيل ماتقدر تمرَّه=مير يالاصعر: ترى اسمك ماوراه الاَّ الخساير!!

عبدالله الاصعر

يالثبيتي معك شاعر والمعاني ماتغره=مايزل عن الحدود ولايزل عن السواير
في مسيل السيل نازل تحسب انك في مسره=واسمك اللي تتفاخربه مع الهيلا مغاير

كبتن عتيبه

كان تبغاها حرابها جايتك فرّه وكرّه=والمعارك فالشعر نعطي لطاريها بشاير!!
في ديار جدودنا والضلع مايترك مقرّه=غير ضلعً عندكم ياهل عشيره والحفاير

كم حريب بشقر البارود في عينه نذره=واليمين ان مدها تكسر ولا تلقى جباير
لا تقوله وانت مالك في قرارة نجد جره=ولا انا مندونها بالسيف الاملح والذخاير

كم من واحد معه هقوه وفالآخر تغرّه=ولايسير بلا بصيره غير عميان البصاير!!
كان مالي فيه جرّه..مالكم مثقال ذرَّه=كيف تجحد فعلنا نهار دارن الدواير؟!