عبدالله بن طلال

سلام ياشعار والليله نبا المعنى بعيد = يسدّ منكم من حظر .. والنار من شبابها
ليلة خميس وودنا نلعب على طرق(ن)جديد = والناس كلن له نظر .. والنار من شبابها

شـــلـــهوب

يامرحبا ياللي تدوّر للمعاني والقصيد=ترحيبة ٍ تبقا شهر .. والنار من شبّابها
يابن طلال إرسم هدفك وقدّم العلم الأكيد=وأنا معك تامر أمر.. والنار من شبّابها

عبدالله بن طلال

ابك البقا ولك البقا والعلم ياصل بالبريد = يجيك من زيد وعمر .. والنار من شبابها
كريم يابرق(ن) سرى والله يقدر مايريد = يمكن يجي عقبه مطر .. والنار من شبابها

شـــلـــهوب

حضرت فالموعد ياخالد مار وش وقع الرصيد=هذا الكلام المختصر.. والنار من شبّابها
أكثر عباد الله يسوّيله هروج ٍ ماتفيد= مار الله يعين الشعر.. والنار من شبّابها

عبدالله بن طلال

شلهوب ياشلهوب كان انك تبا الراي السديد = ماجبت لك علم وخبر .. والنار من شبابها
تلعب معي واتوكّل امكافح وتاخذ ثم تعيد = وزدت الغشامه بالقشر .. والنار من شبابها

أنته علامك وش تنقّص فالحروف ووش تزيد=جمّع علومك في شطر.. والنّار من شبّابها
ماباقي ألا ضلع واحد بين عسفان وقديد=بين القعيده والسبر.. والنّار من شبّابها