ياعلي ابن فلاح ابن فالح علامك ماتروق=الخيل من خيالها والنار من شبابها
الضاهرِ ان ماحصل لك لاصبوح ولاغبوق=يالاعب اللعبه ماتلعبها على لعابها

بين العلوم الطيبّه والثانيه عدّة فروق=الطيبه لاصحابها والثانيه لاصحابها
الله يبيّض وجه رجالٍ على الواجب سبوق=طبع النشاما عن بعضها ما تعوج ارقابها

على الكلام الزين صح الله لسانك يالصدوق=الاوله من حضنا والثانيه وش جابها
من كبر همك ياعلي دمك لايجمد فالعروق=سكينك اللي قبل مافي يدك غير نصابها

عيني تخيل المزنه اللي تلتعج فيها البروق=تبرق وترعد مار ما تسق الديَر و شعابها
والله لسوقك بالمعاني مع طريق الحقّ سوق=الحجّه اللي مالها برهان وش تبغابها

عربون وقفتنا (ازهلوها) لانخون ولانبوق=والا انت في شقتك ومقفل عليك ابوابها
شرهة ماكنته الصدور المقفله على الحلوق=تفتل شنبك وغيرك رجالِ تمس اشنابها