الزمن ذا غريب وكل مابه غرابه=ومن يعيش بزمنا شاف منه الغريبه
ورحمة الله يابن زراق تسبق عذابه=وكل مخلوق بالدنيا نصيبه يصيبه

ذيب العوازم

في محل النمور وفي محل الذيابه=مرحبا مرحبا بأسمي وبأسماء عتيبه
من يبا اللعب يقلط ياهلا ومرحبابه=جيت ارحب واهلي بعد طول المغيبه

عبدالله حبيٌب الزراقي

البقى يارفيق ٍ طال عنا غيابه = ساعة الخير والافراح دايم تجيبه
شدٌ حيلك وراسك لف فيه العصابه = السوالف بعيده والهقاوي قريبه

ذيب العوازم

يابن زراق اشوف الوقت بين عيابه=الله انه يجنبنا دروب المعيبه
كل شايب اليامنه تذكر شبابه= عض الابهام يومه شاف بالعين شيبه

عبدالله حبيٌب الزراقي

لو مشينا على درب النبي والصحابه = كان ماصار هذا الوقت ياذيب.. خيبه
وين دور الصحافه وين دور الرقابه = ان سكتنا مصيبه وان هرجنا مصيبه

ذيب العوازم

زاد شر الأوادم خص بين القرابه=بينهم كل شك وبينهم كل ريبه
قطع الأرحام بلوى ليت مانبتلابه=ماقطع رحمه الا من تردى نصيبه

عبدالله حبيٌب الزراقي

مثل ماهو بحاصل بين ..خنذف شبابه = كل عاقل من الجاهل يسوق الضريبه
صار للثعلب المكٌار فالوقت غابه = والأسد صار بيته وسط شبك الزريبه

ذيب العوازم

الزمن ذا غريب وكل مابه غرابه=ومن يعيش بزمنا شاف منه الغريبه
ورحمة الله يابن زراق تسبق عذابه=وكل مخلوق بالدنيا نصيبه يصيبه

الزمن منقلب والوقت فيه انقلابه = مثل ماقالوا المرضان عالج طيبه
كل واحد مصيره يندفن في ترابه = ثم يلقى حسابه يوم ربي حسيبه