مع هجعة اللي يختفون اول الليل=الغايبه دايم يغيبون معها
النفس تاقت لسمر والتعاليل=والعين أشوف النوم خالف سنعها
وطاب الجلوس بجانب النار ياشعيل=وحط الحطب في ترعتن من ترعها
واليا أستوى للجمر فيها دحاميل=واقبل تواهجها وقفى ولعها
درج على المحماس من غير تعجيل=بريتن دوب اليماني قطعها
أول قطاف أسفوح شم الأقاذيل=اللي جذا حوم الوحش عن فرعها
شمن يساقيها السحاب أبهماليل=ليت إيتحدر سيلها مع تلعها
وترا لحمستها نضام ودواليل=وشريعتن يمشى بثر من شرعها
أول بدايتها مدافع مخاليل=ومسرا جماميل بغالي سلعها
وسوقن كما سوق الجمال المحاميل=مازال حمو النار ماقد لذعها
واليا تطلق من شذاها زعاجيل=وبشت عرق واللون الأشقر بشعها
فالحال سهلها عن النار تسهيل=حتى لضا المحماس مايدّرعها
وعجل لها ياشعيل مسرا الجماميل=بطراد زلباتن تزايد فزعها
تدريجت الحيران ومطارد الخيل=هذي طريقت حمسها واتبعها
ومن عقب ميلها على النجر تمييل=جذاب روس القوم من منتجعها
عوايدله من على سالف الجيل=ماهي جديده توّنا نبتدعها
ومن يوم تنعمها فدوك الدعابيل=فوق اصهب اللون الربيب أتهزعها
وأضبط قياس الماء لها بالمكاييل=ضبط الخبير لصنعتن مخترعها
ومن يوم تقطع خلها مثل ماقيل=ترخي على هدف السبيل أمخذعها
مبهارتن تذعر بغال التشاكيل=طب العماس اليا تيسر سنعها
صفرآ كما القنديل حسنا تعازيل=من صنعتن رسلان الاول صنعها
لادارها اللي يعتني بالمعاميل=وفاحت وبالفنجال الاول ردعها
وفيها تساوت خنت اللبن والهيل=والنفس دافعها علاها دفعها
قم صبلي ياشعيل منها فناجيل=على سنا ضو(ن)تهادا ولعها
أضنها يامال طول التماهيل=تقلع همومي كان ربي قلعها
وتفتح لها أبوابن بصدري مقافيل=وتجمع لي أفكارن تشتت ضيعها
واخذبها عن ضيقت البال تبديل=وصروف دنيا مامشت مع سنعها
دنيا تصيّد بالشبك والمحابيل=ناس(ن) تسايرها وناس اتخدها
أحدن تجيله بالرضا والتساهيل=ولوهو تعب في جمعها ماجمعها
واحدن ركابه مقفياتن مقابيل=ولاباب ولاّ نافذه ماقرعها
وتعطيه قاف أليا طمع بالمواصيل=وينكف معيف وسامحن من طمعها
دنيآ تقذل سبّق الحر تقذيل=وتوهنه في ربعتن من ربعها
لو قد مضاله من شقاها غرابيل=يوم الحرايب مضلماتن بقعها
يوم الطلوع إبها على الهجن والخيل=ماقد فهق عن طلعتن ماطلعها
ويوم أستقرت واغدقت بالمحاصيل=صارت منافعها لمن لانفها
عقبانها تمسي قوايآ مواجيل=والمستفيد غرابها مع مرعها
واللي مسار أمورهم بالبراطيل=واللي متى ماوافقتله بلعها
ومن ذاق در المرزمات الاباهيل=أما حلبها حلب والا رضعها
وحصنيها يرقص على هزت الذيل=ولويجتمع قدمه سباعن سبعا
ولاعندنا ياشعيل للعوج تعديل=ومازال ممشاها على العدل أطعها
وان شفتها قامت تجانف على الميل=بردا ثمن عند أول السوم بعها
واستثن منها قومتن فآخر الليل=في ساعتن كلن يحب إيهجعا
لاجال ثلث الليل الآخر تراتيل=وقامت ملايكة الرضا قمت معها
في ساعتن تكبيرها والتهاليل=يجنا ثمار اعذوقها من زرعها
وخل إجتماعك بالرجال الحلاحيل=اللي خيار المجتمع مجتمعها
ولا تبدي الشكوى ليا ضامك الشيل=ألا على رجل(ن) يحس بوجعها
رجل(ن)ليا أصتكت علاك النشابيل=أما شبرها شبر والا ذرعها
ومن الزمان أخذ العبر بالرحاحيل=اللي منازلهم تهاوى بقعها
ويافكرتي لا جيت بعض المداهيل=ولا شفت فيها عقب حي(ن) رتعها
ألا رسومن دارساتن مواجيل=وخرايمن يزمي السراب أبشمعها
بلاقعن شهب تهاوى زهاليل=الظاهر إن اللي فجعني فجعها
من عقب أهلها لو سقتها المخاييل=مالله نفعها وبركتها نزعها
لاجيتها جضيت من قلت الحيل=ودنياي عندي ضاقبي متسعها
على حلاحيل(ن) تضد الرياجيل=حصنن ماعاد ألا مقالع شيعها