ظلام الليل

ياسلام الله سلامن على سنه ودين=للرجال اللي تنومس بطيب افعالها
ياعتيبه ياهل السيف والرمح المتين=جيتكم واحمل معي دله بمفنجالها

عبدالمجيد العطاوي

ياهلا يامرحبا بالضيوف الغانمين=ردّة حيّة لسان العتيبي قالها
هاتها في الحال واقلط على سمن وسمين=كم رجالٍ ياعميلي شربت ادلالها

ظلام الليل

البقى لك ياصحيبي وبالله نستعين=والعلوم الطيّبه يسلمون ارجالها
الوفا لاهل الوفا والكرم للمكرمين=ودلتي ياصاحبي لك فدى بعيالها

عبدالمجيد العطاوي

العلوم الطيّبة للرجال الطيّبين=والمراجل كلّ طيّب يبى يسعى لها
الرجل لا صار قرم كفو قضّاي دين=كلّ طالة ياصحيبي يبى يرقى لها

ظلام الليل

يالعطاوي كل دربن على عيوني يبين=والدروب الطيّبه عارفين اشكالها
ومن سلك درب الردى ضيّع اليد اليمين=والديار الخاليه ضاع بين جبالها

عبدالمجيد العطاوي

يا ظلام الليل عندي لكم علمٍ يقين=والنصيحة ما تضاهى بروس أموالها
اللقب ركّب على الثعلب وجاء ابا الحصين=افهم الكلمة وظنّي تبى تصحى لها

ظلام الليل

الكلام اللي يجي من جهاله مايهين=والنصايح منعقت يالرفيق حبالها
والظلام اللي تقوله غدا فيه الفطين=وكم ذلولن ياصحيبي غدت بعقالها

عبدالمجيد العطاوي

ان تقبلّت النصايح علاها تستبين=تنفعك لا جاء لقبّا الوغى خيّالها
الدواير دايرة كلّ يوم وكلّ حين=ياليالٍ غابت انجومها واهلالها