لن ولعت نار وحطب ..شكرك على السيف الحدب =والعلم لاقالوا ظهور الخيل ياركابها
يقول حامض ياعنب من لايطولك ياعنب =وحنا الخطيه لاندورها ولانبداء بها

قبلان الدعجاني

سلطان شاعر معتبر مايجهل سلوم العرب = يحسب حساب الكلمه اللي حاسبين احسابها
اللي قراها ماكتب .. واللي سمعها ماخطب = يانعنبوها لحية ٍ ماتحتمي باشنابها

سلطان الجـذع

قبلان ياقبلان سيرها على حكمه وادب =دامك عرفت المشكله حاول تعرف اسبابها
مادامها بين الدقن ياطير شلوى والشنب =علّي سندها تراني سترها وحجابها

قبلان الدعجاني

يلي توصي بالذهب .. جوّد قناطير الذهب =والمشكله لاجاتنا نقفل عليها بابها
اللي لفى يعني وصل .. واللي رحل يعني ذهب = هذي ياسلطان الجذع جمله عليك اعرابها

سلطان الجـذع

قدمي جزيلات المعاني تعترض مثل الشبب= لابد مانرضيك وانت الطيبه ترضابها
للي وصل واللي رحل ..مافيه شئ بلا سبب=واللي تغيب عن الوعد معها العذر بغيابها

قبلان الدعجاني

سوق التداول بالنسب يرفع نسب يرخي نسب = والتوصيه فالسوق عندي صاحبك وادرابها
العذر ماينفع ليا شفت الدما لين الركب = والعين عينك يالجذع لوّك نتفت اهدابها

سلطان الجـذع

سوق التداول بالنسب واحدٍ خسر واحدٍ كسب =واليا ذكرت الاوله عندي وانا كسابها
ياصاحبي ياصاحبي مالي عليك الا العتب =حكم ضميرك لاتشب النار ياشبابها

قبلان الدعجاني

الاوله وقت الطلب .. والثانيه نار وحطب = والثالثه عند الذياب اللي تحد انيابها
يال العجب من كلمتك يابو لهب يال العجب = ذميت ابا القاسم بكلمه .. وانشده وش جابها

سلطان الجـذع

لن ولعت نار وحطب ..شكرك على السيف الحدب =والعلم لاقالوا ظهور الخيل ياركابها
يقول حامض ياعنب من لايطولك ياعنب =وحنا الخطيه لاندورها ولانبداء بها