اعتيبة الهيلا تذرا في ذراها ياجميل= الشجرة الي ماتظلل قصها حتى الجذور.
جدي من الي لايهس ولايزل ولايميل= مشهور في وقت العرب يوم المجاعة والدهور

ايبالله اني في ذراها لو تقول ولو تقيل=الحين في وقت الرخا والعام في وقت السبور
اجمل صفاته قلتها لكنّ ماجبت الدليل=مدري حيا والا جهل والا عدم حب الظهور

يسقيك همال المطر ويجيك وبل ٍ معة سيل =يخضر نوارة وريح العطر بطراف الزهور
الديرة الي مايعيش ابها الضعيف مع الذليل= يم الغبيا ديرتي قبل الشرافا والعمور.

دعوتك جاتك ياعميلي واعتبرها لك سبيل=يالصاحب اللي فوق نفسك من هواجيسك تدور
والنعم في سمعة بني عمك هل الشبر الطويل=الديره اللي ماسكنها الا الحرار من الصقور

مدري عرفت الدار ولاغاديٍ في وقت ليل= اوضح لي البرهان واطلع ماتكن ابة السدور.
لاني من المطران وياحرب وسبيع وهذيل= ولاني من الدوسر ولاقحطان مافيهم قصور.

مدحت صاحبنا ووصلته على العالي سهيل=والظاهر ان المدح روّع صاحبي بس معذور
والنعم في كل القبايل عد همال المخيل=يقولها الروقي واضن الطيب ماهوب محكور

ياعنك ماروعتني لو كان تصهلي صهيل= الكلمة الي قلتها تحسب عليك من الحظور.
ربعي تسما الروم يوم ٍ المغازي فوق خيل= مضرابها بالشلف مايخط الجماجم والنحور

الاسم يارجال مجهولٍ ولو انه جميل=والكلمه اللي قلتها فيها من ارياح البخور
افصح عن المجهول يالرومي ترا ماهو مهيل=وابا انتظر منك الجواب الى الفجر بعد السحور