ياطيّب الفال جعلك طيّب الفال=لاتقرب الضلع تسري بك سباعه
تقول ياعم وانا اقول ياخال=وان قلت لك شي قل سمعاً وطاعه

مابين ذيك السباع احط منزال=والا انت ياصاحبي صابك مجاعه
الخال ياخذ مكان الاب فالحال=ومن خالك احذر يجي في القلب راعه

في تالي ايامنا حمل الجمل مال=واليوم اشوف الجمل يومي كراعه
يالوالد اللي عليك شماغ وعقال=بابورك اليوم طيرنا شراعه

زبد العرب ياعرب ياسرع ماسال=واخاف لايكون تخطيط ولكاعه
اصحيبنا ياعرب بالحيل محتال=ايقول بابوركم حلو ارتفاعه

مازال سارح مثل ماكان مازال=وضيفة المطبعه شغل الطباعه
حنّا لقينا معك مخرج ومدخال=ولانهرج الا بمنطوق الوقاعه

مايزعل الحق يارجال رجال=والنفس تجحد وتاليها القناعه
مادام بينك وبين الناس مرسال=واصل طريقك بترتيب وبراعه