انا ماشمت مع ربعي رياجيل الوفاء ملزوم =لكن الوقت تبعدني وتدنيني مقاديره
ترانا مالحقنا فالسوالف ظلم وام الدوم =ولكن انشد سعود العصيمي واخذ تقريره

ياسلطان الجذع ماحدن يقدر عيشة المحروم = لاتشكي للزمان ولاتدوّر من معاذيره
ترى خانك لسانك قصدك الاهرام يا زيزوم = اثرك انته تراجع مرجعك وتجيب تبريره

والا ياصحابنا اهل ظلم ماغير الرجوم رجوم =تذروا سدها لاجاكم الصيف ومعاصيره
انا ماخانني منطق لسان ..ومقصدي معلوم =ولكن انت تفسيرك((مجنح ))شوف لك غيره

ترى اللقمه في حلقك نشبت وسدّت لك البلعوم = وطول الوقت تشحذ للغنم برسيم وشعيره
ياسلطان العن الشيطان واحذر لا تخاو البوم = ولاتفخر بخوتهم وتصبح عيرتك عيره

تسير بالخطاب اللي عليه من الشيوخ ختوم =واظنك تالي الايام من جرف لدحديره
قبل لا أعرفك هذيه {{وصيه جدي المرحوم}}=لكن ادفن علومك لاتزعل ساكن الديره

ترى ماحدن بطامع فيك وانته برطمك مشروم = ولا ياللي دلوّ الناس زارت جمه وبيره
قديمه يالجذع ترجع وتاطا الجمر يالضرغوم = تحولها على ربعك حسافه نجس تفكيره

انا مااحد بطامع بي وسيفي فالعرب ملحوم =ولكن انت كل طامع بك يالله الخيره
تصوم تصوم يالطيب وتفطر بالبصل والثوم =نبا رجلك تقدم وانت تفهقها بتاخيره