ياسلام الله سلام اسلام والتسليم سنه=وين مرزوق العتيبي وين والمذهب سعودي
فيه فنجالٍ مصفّى وازنٍ هيله وبنه=باليمين يمد للغالين والمذهب سعودي

مرحبا ترحيب وافي للوفي مافيه منّه = والوفا من عادة الوافين ... والبيرق سعودي
يابو خالد هات علمك هات علمك لاتكنّه = وش طرالك جعل فالك زين ... والبيرق سعودي

البقا بالوافي اللي عادته نجره يدنه=بالكرم في كل وقت وحين والبيرق سعودي
فيه علمٍ في ضميري مير لكنه لكنه=وا عنايه من غوى الغاوين والبيرق سعودي

ماعليكم زود ياللي ما اختلف ظني وظنه = لو تطوف اسنين بعد سنين .. والبيرق سعودي
من غوى يلقى رياجيل ٍ تبى تقلع مغنّه = لايهمك راعي الوجهين .. والبيرق سعودي

كل رجالٍ يعامل حسب تفكيره وسنه=لو تياسر والطريق ايمين والبيرق سعودي
والنفوس الطايشه غير النفوس المطمئنه=يالله الغفران قول آمين والبيرق سعودي

الردى خصله ولايمكن تغيّر فابو زنّه = لو نصحته مايكب الشين .. والبيرق سعودي
لاحصل شرواك شاعر يلفت الانظار فنّه = وش علانا من غراب البين .. والبيرق سعودي

اذكر الله واعرف انه فيه نار وفيه جنه=لاتحمر بالنظر بالعين والبيرق سعودي
لاتعنى بالنظر فى الكون بين إنسه وجنه=ثم تصبح بين جيم وسين والبيرق سعودي